ವಿಡಂಬನೆ | ನಾಗರಾಜ ವೈದ್ಯ
ಕೇಂದ್ರ ಸರ್ಕಾರ ಮತ್ತೊಮ್ಮೆ ಒಂದು ಅದ್ಭುತ ಚಮತ್ಕಾರ ಮಾಡಲು ಹೊರಟಿದೆ. ಅದೇ 'ಬಿಎಸ್ಎನ್ಎಲ್ ಪುನರುತ್ಥಾನ'. ಇದು ಎಷ್ಟನೆಯ ಬಾರಿ ಪುನರುತ್ಥಾನ ಆಗುತ್ತಿದೆ ಅನ್ನೋದು ಸ್ವತಃ ಆ ದೇವರಿಗೂ ನೆನಪಿರಲಿಕ್ಕಿಲ್ಲ. ಈ ಬಾರಿ ಸರ್ಕಾರ ಬಿಟ್ಟಿ ಯಾತ್ರೆಗೆ ಕರ್ಕೊಂಡು ಹೋಗುವ ತರಹ, ಬಿಎಸ್ಎನ್ಎಲ್ಗೆ ಬರೋಬ್ಬರಿ 28,473 ಕೋಟಿ ರೂಪಾಯಿ 'ಗಿಫ್ಟ್' ಕೊಟ್ಟಿದೆ. ಸಚಿವ ಜ್ಯೋತಿರಾದಿತ್ಯ ಸಿಂಧಿಯಾ ಅವರು ಇದನ್ನು ಘೋಷಿಸುವಾಗ ಅವರ ಮುಖದಲ್ಲಿ ಇದ್ದ ನಂಬಿಕೆ ನೋಡಬೇಕಿತ್ತು, ಅದು ಹೇಗಿತ್ತು ಅಂದ್ರೆ, 'ಈ ಬಾರಿ ಪಕ್ಕಾ ಮಳೆ ಬರುತ್ತೆ' ಅಂತ ಹವಾಮಾನ ಇಲಾಖೆ ಹೇಳಿದ ಹಾಗಿತ್ತು. ಮಳೆ ಬರುತ್ತೋ ಇಲ್ಲವೋ ಗೊತ್ತಿಲ್ಲ, ಆದರೆ ಜನರ ತೆರಿಗೆ ಹಣ ಮಾತ್ರ ಹೊಳೆಯಲ್ಲಿ ಹುಣಸೆ ಹಣ್ಣು ತೊಳೆದ ಹಾಗೆ ಕರಗುವುದು ಪಕ್ಕಾ.
ನಮ್ಮ ದೇಶದಲ್ಲಿ ಎರಡು ವಸ್ತು ತುಂಬಾ ಅಪರೂಪ. ಒಂದು 'ಒರಿಜಿನಲ್ ರೇಷ್ಮೆ ಸೀರೆ', ಇನ್ನೊಂದು 'ಬಿಎಸ್ಎನ್ಎಲ್ ಫುಲ್ ಸಿಗ್ನಲ್'. ಜಿಯೋ ಮತ್ತು ಏರ್ಟೆಲ್ನವರು 5ಜಿ ಕೊಟ್ಟು, ಈಗ 6ಜಿ ಕಡೆಗೆ ಕಣ್ಣು ಹಾಯಿಸಿದರೆ, ಬಿಎಸ್ಎನ್ಎಲ್ನವರು ಇನ್ನು 'ಜಿ' (G) ಹುಡುಕ್ತಾ ಇದ್ದಾರೆ. ಅವರು 3ಜಿ ನಿಂದ 4ಜಿ ಗೆ ಬರೋಕೆ ತೆಗೆದುಕೊಂಡ ಸಮಯ ನೋಡಿದ್ರೆ, ಬಹುಶಃ ಇಷ್ಟು ಹೊತ್ತಿಗೆ ಎಲಾನ್ ಮಸ್ಕ್ ಮಂಗಳ ಗ್ರಹದ ಮೇಲೆ ಕಾಲೋನಿ ಕಟ್ಟಿ ಅಲ್ಲಿಂದ ಲೈವ್ ವಿಡಿಯೋ ಕಾಲ್ ಮಾಡಿದ್ರು ಮಾಡ್ತಿದ್ರೇನೋ. 28 ಸಾವಿರ ಕೋಟಿ ಕೊಟ್ಟಿರೋದು ನೆಟ್ವರ್ಕ್ ಸ್ಪೀಡ್ ಜಾಸ್ತಿ ಮಾಡೋಕ್ಕೋ ಅಥವಾ 'ಕಾಲ್ ಡ್ರಾಪ್' ರೆಕಾರ್ಡ್ ಬ್ರೇಕ್ ಮಾಡೋಕ್ಕೋ ಅನ್ನೋದು ಇನ್ನು ಸಸ್ಪೆನ್ಸ್. ಯಾಕೆಂದ್ರೆ ಬಿಎಸ್ಎನ್ಎಲ್ ಸಿಮ್ ಹಾಕೊಂಡ್ರೆ ಮನುಷ್ಯ ತಾಳ್ಮೆ ಕಲಿಯೋಕೆ ಬೇರೆ ಮೆಡಿಟೇಶನ್ ಸೆಂಟರ್ಗೆ ಹೋಗ್ಬೇಕಾಗಿಲ್ಲ.
ಬಿಎಸ್ಎನ್ಎಲ್ ಆಫೀಸ್ಗೆ ಹೋದ್ರೆ ಅಲ್ಲಿನ ವೈಬ್ಸ್ (Vibes) ಬೇರೆ ಲೆವೆಲ್ ಇರುತ್ತೆ. ಅಲ್ಲಿ ಸಮಯ ಹೇಗೆ ಸ್ಲೋ ಆಗಿ ಚಲಿಸುತ್ತೆ ಅಂದ್ರೆ, ನೀವು ಬೆಳಿಗ್ಗೆ ಹೋದ ಕೆಲಸ, ಸಂಜೆ ಆಗೋ ಹೊತ್ತಿಗೆ 'ಲಂಚ್ ಟೈಮ್' ಕಾರಣದಿಂದ ಪೋಸ್ಟ್ಪೋನ್ ಆಗುತ್ತೆ. ಖಾಸಗಿ ಕಂಪನಿಗಳು ಗ್ರಾಹಕರನ್ನು 'ಸರ್, ಮೇಡಂ' ಅಂತ ಕರೆದು, ಕಾಫಿ ಕೊಟ್ಟು ಮಾತಾಡಿಸ್ತಾರೆ. ಬಿಎಸ್ಎನ್ಎಲ್ನಲ್ಲಿ ಹಾಗೆ ಅಲ್ಲ, ನೀವು ಕೌಂಟರ್ ಮುಂದೆ ನಿಂತು 'ಸರ್ ನಮ್ ಸಿಮ್ ವರ್ಕ್ ಆಗ್ತಿಲ್ಲ' ಅಂದ್ರೆ, ಅವರು ನಿಮ್ಮನ್ನು ನೋಡುವ ರೀತಿ ಹೇಗಿರುತ್ತೆ ಅಂದ್ರೆ, 'ಸಿಮ್ ವರ್ಕ್ ಆಗ್ತಿಲ್ಲ ಅಂತ ಇಲ್ಲಿಗೆ ಯಾಕ್ ಬಂದ್ರಿ? ಅದನ್ನ ಸ್ವಲ್ಪ ಗಾಳೀಲಿ ತೂರಿ, ಬಿಸಿಲಿಗೆ ಒಣಗಿಸಿ ಸರಿ ಹೋಗುತ್ತೆ' ಅನ್ನುವ ತರಹ ಇರುತ್ತೆ. ಈ 28 ಸಾವಿರ ಕೋಟಿಯಲ್ಲಿ ಸ್ವಲ್ಪ ಹಣ ಈ 'ಆಟಿಟ್ಯೂಡ್' ಚೇಂಜ್ ಮಾಡೋಕೆ ಬಳಸಿದ್ರೆ ದೇಶಕ್ಕೆ ಒಳ್ಳೆಯದು.
ಸರ್ಕಾರ ಹೇಳುತ್ತೆ, ಇದು 'ಸ್ಟ್ರಾಟೆಜಿಕ್ ಅಸೆಟ್' (Strategic Asset) ಅಂತ. ಹೌದು, ಯುದ್ಧ ಆದಾಗ, ಪ್ರಳಯ ಆದಾಗ, ಬೇರೆ ಯಾವ ನೆಟ್ವರ್ಕ್ ಸಿಗದೇ ಇದ್ದಾಗ ಬಿಎಸ್ಎನ್ಎಲ್ ಸಿಗುತ್ತೆ ಅಂತ. ಅಂದ್ರೆ ಇದರ ಅರ್ಥ, ನೀವು ಬಿಎಸ್ಎನ್ಎಲ್ ಯೂಸ್ ಮಾಡ್ಬೇಕಂದ್ರೆ ದೇಶದಲ್ಲಿ ಯುದ್ಧ ಆಗ್ಬೇಕಾ? ಸಾಮಾನ್ಯ ದಿನಗಳಲ್ಲಿ ಒಂದು ಒಟಿಪಿ (OTP) ಬರೋಕೆ 5 ನಿಮಿಷ ಕಾಯಬೇಕು. ಒಟಿಪಿ ಬಂದು ನೀವು ಟೈಪ್ ಮಾಡುವ ಹೊತ್ತಿಗೆ ಸೆಷನ್ ಎಕ್ಸ್ಪೈರ್ ಆಗಿರುತ್ತೆ. ಇದು ಬಿಎಸ್ಎನ್ಎಲ್ ಕೊಡೋ ಸೆಕ್ಯೂರಿಟಿ ಫೀಚರ್ ಅನ್ಸುತ್ತೆ! ಕಳ್ಳ ಕಾಕರಿಂದ ನಮ್ಮ ಅಕೌಂಟ್ ಸೇವ್ ಮಾಡೋಕೆ ಇವರು ನೆಟ್ವರ್ಕ್ ಕೊಡಲ್ಲ. ಗ್ರೇಟ್ ಸ್ಟ್ರಾಟೆಜಿ!
ಖರೆ ಹೇಳ್ಬೇಕಂದ್ರೆ, ಬಿಎಸ್ಎನ್ಎಲ್ ಒಂದು ಅದ್ಭುತ ಟೈಮ್ ಮಷೀನ್. ನೀವು ಅದರ ಡೇಟಾ ಆನ್ ಮಾಡಿದ್ರೆ, ನೇರವಾಗಿ 2010ಕ್ಕೆ ವಾಪಸ್ ಹೋಗ್ತೀರಾ. ಫೋಟೋ ಲೋಡ್ ಆಗಲ್ಲ, ವಿಡಿಯೋ ಪ್ಲೇ ಆಗಲ್ಲ, ಕೇವಲ ಬಫರಿಂಗ್ ಗುರಿ ನೋಡ್ಕೊಂಡು ಕೂತಿರಬೇಕು. ಖಾಸಗಿ ಕಂಪನಿಗಳು 'ಅನ್ಲಿಮಿಟೆಡ್ 5ಜಿ ಡೇಟಾ' ಕೊಡ್ತಿದ್ದರೆ, ಬಿಎಸ್ಎನ್ಎಲ್ನಲ್ಲಿ 'ಅನ್ಲಿಮಿಟೆಡ್ ಬಫರಿಂಗ್' ಫ್ರೀ ಆಗಿ ಸಿಗುತ್ತೆ. ಸರ್ಕಾರ ಕೋಟಿ ಕೋಟಿ ಸುರಿದ್ರೂ, ಈ ಬಫರಿಂಗ್ ಮಾತ್ರ ಹೋಗಲ್ಲ. ಬಹುಶಃ ಆ ಟವರ್ಗಳಿಗೆ 'ವಾಸ್ತು' ಸರಿ ಇಲ್ವಾ ಏನೋ? ಅಥವಾ ಟವರ್ ನಿಲ್ಲಿಸೋ ಜಾಗದಲ್ಲಿ ನಿಧಿ ಇದೆಯಾ ಅಂತ ಚೆಕ್ ಮಾಡೋಕೆ ಟೈಮ್ ಹಿಡಿತಿದಾ ಏನೋ?
ಇನ್ನು 'ಭಾರತ್ ನೆಟ್' ಬಗ್ಗೆ ಮಾತಾಡೋಣ. ಹಳ್ಳಿಗಳಿಗೆ ಇಂಟರ್ನೆಟ್ ತಲುಪಿಸೋ ಯೋಜನೆ. ಇದೇ 28 ಸಾವಿರ ಕೋಟಿಯಲ್ಲಿ ಅದಕ್ಕೂ ಸ್ವಲ್ಪ ಪಾಲು ಇದೆ. ಹಳ್ಳಿಯಲ್ಲಿ ಕೆಂಚ, ಗುಂಡ ಎಲ್ಲರೂ 5ಜಿ ಫೋನ್ ಹಿಡ್ಕೊಂಡು ಜಿಯೋದಲ್ಲಿ ರೀಲ್ಸ್ ನೋಡ್ತಾ ಇದ್ದಾರೆ. ಬಿಎಸ್ಎನ್ಎಲ್ನವರು ಇನ್ನು ಕೇಬಲ್ ಎಳೆಯೋ ಪ್ಲಾನ್ ಮಾಡ್ತಿದ್ದಾರೆ. ಅವರು ಕೇಬಲ್ ಎಳೆದು, ಕನೆಕ್ಷನ್ ಕೊಡೋ ಹೊತ್ತಿಗೆ, ಆ ಹಳ್ಳಿ ಸ್ಮಾರ್ಟ್ ಸಿಟಿ ಆಗಿ ಕನ್ವರ್ಟ್ ಆಗಿರುತ್ತೆ. ಸರ್ಕಾರಿ ಕೆಲಸ ಅಂದ್ರೆ ಹಾಗೆ, 'ಸ್ಲೋ ಆಂಡ್ ಸ್ಟೆಡಿ' ಅಲ್ಲ, 'ಸ್ಲೋ ಆಂಡ್ ಸ್ಟಾಪ್'. ಹಳ್ಳಿಯವರು ಬಿಎಸ್ಎನ್ಎಲ್ ಬ್ರಾಡ್ಬ್ಯಾಂಡ್ಗೆ ಕಾಯೋದು ಅಂದ್ರೆ, ಮಳೆಗೆ ಕಾಯುವ ಚಾತಕ ಪಕ್ಷಿ ತರಹ ಆಗಿದೆ.
ಖಾಸಗಿ ಕಂಪನಿಗಳು ತಮ್ಮ ಗ್ರಾಹಕರನ್ನು ಉಳಿಕೊಳ್ಳಲು ನಿತ್ಯ ಹೊಸಹೊಸ ತಂತ್ರಜ್ಞಾನ, ಆಫರ್ಗಳು, ಮತ್ತು ವೇಗದ ಸೇವೆಯನ್ನು ನೀಡುತ್ತಿವೆ. ಅವರಿಗೆ ಗ್ರಾಹಕರೇ ದೇವರು, ಯಾಕೆಂದ್ರೆ ಗ್ರಾಹಕರು ಹೋದರೆ ಕಂಪನಿ ಮುಚ್ಚಬೇಕಾಗುತ್ತೆ. ಆದರೆ ಬಿಎಸ್ಎನ್ಎಲ್ಗೆ ಆ ಭಯ ಇಲ್ಲ. ಗ್ರಾಹಕರು ಇದ್ದಾರೋ ಬಿಟ್ರೋ, ಸರ್ಕಾರ ಇದ್ಯಲ್ಲ ಬೇಲ್ಔಟ್ ಪ್ಯಾಕೇಜ್ ಕೊಡೋಕೆ ಎಂಬ ಧೈರ್ಯ ಇದ್ದ ಹಾಗಿದೆ. ಪ್ರತಿ ವರ್ಷ ಬಜೆಟ್ ಬಂದಾಗ ಒಂದು ದೊಡ್ಡ ಮೊತ್ತವನ್ನು ಬಿಎಸ್ಎನ್ಎಲ್ಗೆ ನೀಡಲಾಗುತ್ತದೆ. ಆದರೆ ಆ ಹಣ ಎಲ್ಲಿ ಹೋಗುತ್ತಿದೆ? ನೆಟ್ವರ್ಕ್ ಟವರ್ಗಳ ಸುಧಾರಣೆಗೆ ಬಳಕೆಯಾಗುತ್ತಿದೆಯಾ ಅಥವಾ ಕೇವಲ ನಿತ್ಯದ ನಿರ್ವಹಣೆಗೆ ಖರ್ಚಾಗುತ್ತಿದೆಯಾ ಎಂಬುದು ಒಂದು ಯಕ್ಷ ಪ್ರಶ್ನೆ.
ಸರ್ಕಾರ ಬಿಎಸ್ಎನ್ಎಲ್ಗೆ ಸ್ಪೆಕ್ಟ್ರಮ್ ಕೊಡಲು ಸಿದ್ಧವಿದೆ, ಹಣ ಕೊಡಲು ಸಿದ್ಧವಿದೆ. ಆದರೆ ಬಿಎಸ್ಎನ್ಎಲ್ ಅದನ್ನು ಬಳಸಿಕೊಂಡ್ರಿಲ್ಲ ಅಂದ್ರೆ ತಪ್ಪು ಯಾರದ್ದು? ಖಾಸಗಿ ಕಂಪನಿಗಳು ಸ್ಪೆಕ್ಟ್ರಮ್ಗಾಗಿ ಸಾವಿರಾರು ಕೋಟಿ ಕೊಟ್ಟು ಹರಾಜಿನಲ್ಲಿ ತೆಗೆದುಕೊಳ್ಳುತ್ತವೆ. ಅವರು ಅಷ್ಟು ದೊಡ್ಡ ಮೊತ್ತ ಇನ್ವೆಸ್ಟ್ ಮಾಡಿದಾಗ, ಅದರಿಂದ ಲಾಭ ತೆಗೆಯಲೇಬೇಕು ಎಂಬ ಒತ್ತಡ ಇರುತ್ತೆ. ಬಿಎಸ್ಎನ್ಎಲ್ಗೆ ಸರ್ಕಾರ ಸ್ಪೆಕ್ಟ್ರಮ್ ಅನ್ನು ಸುಲಭವಾಗಿ ನೀಡಿದಾಗ, ಅದರ ಮೌಲ್ಯ ಅರಿವಾಗುವುದಿಲ್ಲ. ಫ್ರೀ ಆಗಿ ಸಿಕ್ಕಾಗ ಅದರ ಬೆಲೆ ಗೊತ್ತಾಗಲ್ಲ ಅನ್ನುವ ಮಾತು ಇಲ್ಲಿ ಅನ್ವಯಿಸುತ್ತೆ.
ಶೇ.40 ಅನುದಾನ ಹೆಚ್ಚಳ ಮಾಡಿರುವುದು ಸರ್ಕಾರದ ನಿರ್ಧಾರ. ಆದರೆ ಈ ಹೆಚ್ಚಳ ಬಿಎಸ್ಎನ್ಎಲ್ ನೆಟ್ವರ್ಕ್ ಸ್ಪೀಡ್ನಲ್ಲಿ 40% ಹೆಚ್ಚಳ ತರುತ್ತೆಯಾ? ಅಥವಾ ಕಾಲ್ ಡ್ರಾಪ್ ಪ್ರಮಾಣದಲ್ಲಿ 40% ಕಡಿತ ಮಾಡುತ್ತೆಯಾ? ಇದು ಮಿಲಿಯನ್ ಡಾಲರ್ ಪ್ರಶ್ನೆ. ಖಾಸಗಿ ಕಂಪನಿಗಳು ತಮ್ಮ ಇನ್ಫ್ರಾಸ್ಟ್ರಕ್ಚರ್ ಅನ್ನು ಆಪ್ಟಿಮೈಸ್ ಮಾಡಿಕೊಳ್ಳುತ್ತವೆ. ಒಂದು ಟವರ್ ಇಂದ ಎಷ್ಟು ಗ್ರಾಹಕರಿಗೆ ಸೇವೆ ಕೊಡಬಹುದು ಎಂದು ಲೆಕ್ಕ ಹಾಕುತ್ತವೆ. ಬಿಎಸ್ಎನ್ಎಲ್ ಹಾಗೆ ಅಲ್ಲ. ಕೆಲವೊಮ್ಮೆ ಟವರ್ ಇರುತ್ತೆ, ಅದಕ್ಕೆ ಬ್ಯಾಕಪ್ ಪವರ್ ಇರಲ್ಲ. ಪವರ್ ಇದ್ರೆ, ಲಿಂಕ್ ಫೇಲ್ಯೂರ್ ಇರುತ್ತೆ. ಹೀಗೆ ಒಂದು ಸೈಕಲ್ನಲ್ಲಿ ಸಮಸ್ಯೆ ಸುತ್ತಾ ಹೊಡೆಯುತ್ತಾ ಇರುತ್ತೆ.
ಬಿಎಸ್ಎನ್ಎಲ್ ಪುನರುತ್ಥಾನ ಅನ್ನೋದು ಒಂದು ಎಂಡ್ಲೆಸ್ (Endless) ವೆಬ್ ಸೀರೀಸ್ ಇದ್ದಂಗೆ. ಪ್ರತಿ ವರ್ಷ ಬಜೆಟ್ನಲ್ಲಿ ಒಂದು ಹೊಸ ಸೀಸನ್ ಬರುತ್ತೆ. ಹೊಸ ಟ್ವಿಸ್ಟ್ (ಅನುದಾನ), ಹೊಸ ವಿಲನ್ (ನಷ್ಟ), ಆದರೆ ಹೀರೋ (ಬಿಎಸ್ಎನ್ಎಲ್) ಮಾತ್ರ ಚೇಂಜ್ ಆಗಲ್ಲ. ಅವರು ಅದೇ ಹಳೆಯ ಸೈಕಲ್ನಲ್ಲಿ ಬರ್ತಾರೆ. ಖಾಸಗಿ ಕಂಪನಿಗಳು ಫೆರಾರಿಯಲ್ಲಿ ಹೋದ್ರೆ, ನಮ್ಮ ಬಿಎಸ್ಎನ್ಎಲ್ ಎತ್ತಿನ ಬಂಡೀಲಿ ಹೊರಟಿದೆ. ಸರ್ಕಾರ ಎಷ್ಟೇ ಪೆಟ್ರೋಲ್ (ದುಡ್ಡು) ಹಾಕಿದ್ರೂ, ಬಂಡಿ ಮಾತ್ರ ಸ್ಪೀಡ್ ಆಗಲ್ಲ. ಯಾಕೆಂದ್ರೆ ಬಂಡಿ ಚಕ್ರದಲ್ಲಿ ಗಾಳಿ (ಮೋಟಿವೇಷನ್) ಇಲ್ಲ.
ಕೊನೇಲಿ ಒಂದು ಮಾತು, ಸರ್ಕಾರ ಬಿಎಸ್ಎನ್ಎಲ್ಗೆ 28,473 ಕೋಟಿ ಕೊಟ್ಟಿರೋದು ನೋಡಿದ್ರೆ, ಒಂದು ಹಳೆಯ ಕನ್ನಡ ಗಾದೆ ನೆನಪಾಗುತ್ತೆ - "ಅಳಿಯೋನಿಗೆ ಅಳಿವು ತಪ್ಪಲ್ಲ, ಉಳಿಯೋನಿಗೆ ಉಳಿವು ತಪ್ಪಲ್ಲ". ಎಷ್ಟೇ ಕೊಟ್ರೂ ಬಿಎಸ್ಎನ್ಎಲ್ ನಿಲ್ಲಲ್ಲ, ಹಾಗೇ ಖಾಸಗಿ ಕಂಪನಿಗಳು ಎಷ್ಟೇ ರೇಟ್ ಜಾಸ್ತಿ ಮಾಡಿದ್ರೂ ಅವರ ಸ್ಪೀಡ್ಗೆ ಜನ ಓಡುವುದು ನಿಲ್ಲಲ್ಲ. ಈ ಅನುದಾನ ವೇಸ್ಟ್ ಆಗದೆ, ಕೊನೆಯಪಕ್ಷ ಬಿಎಸ್ಎನ್ಎಲ್ ಟವರ್ ಇಂದ ಪಕ್ಷಿಗಳಿಗೂ ತೊಂದರೆ ಆಗದ ರೀತಿ, ಒಂದು ಎರಡು ಕಡ್ಡಿ ಸಿಗ್ನಲ್ ಬಂದ್ರೂ ಪುಣ್ಯ. ಅಲ್ಲಿವರೆಗೂ, 'ದಿ ನಂಬರ್ ಯೂ ಆರ್ ಕಾಲಿಂಗ್ ಈಸ್ ಕರೆಂಟ್ಲಿ ಔಟ್ ಆಫ್ ನೆಟ್ವರ್ಕ್ ಕವರೇಜ್' ಅನ್ನೋದೇ ಬಿಎಸ್ಎನ್ಎಲ್ನ ರಾಷ್ಟ್ರಗೀತೆ!
ಚಂದವಾದ ಬರವಣಿಗೆ
ಬ್ರೇಕಿಂಗ್ ನ್ಯೂಸ್, ಟ್ರೆಂಡಿಂಗ್ ಸ್ಟೋರಿ ಆಳವಾದ ವಿಶ್ಲೇಷಣೆಗಳನ್ನು ನಿರಂತರವಾಗಿ ಪಡೆಯಲು ಉಚಿತವಾಗಿ ಚಂದಾದಾರರಾಗಿ.
