ಡಿಜಿಟಲ್ ಸಾಕ್ಷರತೆ ಇಲ್ಲದ ಅಧಿಕಾರಿಗಳ ಕೈಯಲ್ಲಿ ಹರಾಜಾಗುತ್ತಿದೆ ಸಾರ್ವಜನಿಕರ ಭವಿಷ್ಯ! | ವಾಟ್ಸಾಪ್ ಗ್ರೂಪ್ಗಳಲ್ಲಿ ಹರಾಜಾಗುತ್ತಿದೆ ಜನರ ಖಾಸಗಿತನ: ಸರ್ಕಾರ ಮೌನವೇಕೆ? | ಡೇಟಾ ಸೋರಿಕೆ: ಸರ್ಕಾರದ ಮಟ್ಟದಲ್ಲಿ ಬೇಕಿದೆ ಕಠಿಣ ಕಾನೂನು
| ನಾಗರಾಜ ವೈದ್ಯ, ಸಂಪಾದಕ, ಟೆಕ್ವೈದ್ಯ ಗ್ಲೋಬಲ್
ಡಿಜಿಟಲ್ ಇಂಡಿಯಾ, ಇ-ಆಡಳಿತ, ಪೇಪರ್ ಲೆಸ್ ಆಫೀಸ್ ಎಂಬೆಲ್ಲಾ ತಂತ್ರಜ್ಞಾನದ ಬೃಹತ್ ಶಬ್ದಗಳ ನಡುವೆ ನಮ್ಮ ಸರ್ಕಾರಿ ವ್ಯವಸ್ಥೆ ಅದೆಷ್ಟು ಅಮಾನವೀಯವಾಗಿ ಮತ್ತು ಬೇಜವಾಬ್ದಾರಿಯಿಂದ ವರ್ತಿಸುತ್ತಿದೆ ಎಂಬುದಕ್ಕೆ ಇಂದಿನ ವಾಟ್ಸಾಪ್ ಆಡಳಿತವೇ ಸಾಕ್ಷಿ. ವ್ಯವಸ್ಥೆಯನ್ನು ಜನರ ಬಳಿಗೆ ಕೊಂಡೊಯ್ಯುತ್ತೇವೆ ಎಂದು ಹೇಳಿಕೊಳ್ಳುವ ಇಲಾಖೆಗಳು ಇಂದು ಪ್ರತಿಯೊಂದಕ್ಕೂ ವಾಟ್ಸಾಪ್ ಗ್ರೂಪ್ಗಳನ್ನು ತೆರೆದುಕೊಂಡು ಕೂತಿವೆ. ಗ್ರಾಮ ಪಂಚಾಯತಿಗಳು, ಪೊಲೀಸ್ ಇಲಾಖೆಯ ಗ್ರಾಮೀಣ ಬೀಟ್ ವ್ಯವಸ್ಥೆ, ಕೃಷಿ ಇಲಾಖೆಯ ಫಲಾನುಭವಿಗಳ ಗುಂಪು, ಮಹಿಳಾ ಮತ್ತು ಮಕ್ಕಳ ಕಲ್ಯಾಣ ಇಲಾಖೆಯ ಗುಂಪುಗಳು ಹೀಗೆ ಎಣಿಕೆಗೆ ಸಿಗದಷ್ಟು ಪಬ್ಲಿಕ್ ವಾಟ್ಸಾಪ್ ಗ್ರೂಪ್ಗಳು ಇಂದು ಕಾರ್ಯಾಚರಿಸುತ್ತಿವೆ.
ಮೇಲ್ನೋಟಕ್ಕೆ ಈ ವಾಟ್ಸಾಪ್ ಗ್ರೂಪ್ಗಳು ಆಡಳಿತದ ವೇಗವನ್ನು ಹೆಚ್ಚಿಸಿವೆ, ಮಾಹಿತಿಯನ್ನು ಕ್ಷಣಾರ್ಧದಲ್ಲಿ ಕಟ್ಟಕಡೆಯ ವ್ಯಕ್ತಿಗೂ ತಲುಪಿಸುತ್ತಿವೆ ಎಂದು ಭ್ರಮಿಸಬಹುದು. ಆದರೆ, ಇದೇ ಗ್ರೂಪ್ಗಳ ಹಿಂದೆ ಅಡಗಿರುವ ಡಿಜಿಟಲ್ ಅಜ್ಞಾನ ಎಂತಹ ಭೀಕರ ಸೈಬರ್ ದುರಂತಕ್ಕೆ ನಾಂದಿ ಹಾಡುತ್ತಿದೆ ಎಂಬ ಕನಿಷ್ಠ ಪರಿಜ್ಞಾನವೂ ನಮ್ಮ ಅಧಿಕಾರಿಗಳಿಗೆ ಇಲ್ಲ. ಡಿಜಿಟಲ್ ಸಾಕ್ಷರತೆಯ ಗಂಧಗಾಳಿಯೂ ಇಲ್ಲದ, ಸ್ಮಾರ್ಟ್ ಫೋನ್ ಅನ್ನು ಕೇವಲ ಫಾರ್ವರ್ಡ್ ಮೆಸೇಜ್ಗಳಿಗೆ ಮಾತ್ರ ಬಳಸುವ ಅಧಿಕಾರಿಗಳ ಕೈಗೆ ಆಡಳಿತದ ಡೇಟಾ ಸಿಕ್ಕಿರುವುದು ಕೋತಿಯ ಕೈಗೆ ಮಾಣಿಕ್ಯ ಕೊಟ್ಟಂತಾಗಿದೆ.
ಇಂದಿನ ಡಿಜಿಟಲ್ ಯುಗದಲ್ಲಿ ಡೇಟಾ ಎಂದರೆ ಅದು ಕೇವಲ ಅಕ್ಷರಗಳಲ್ಲ, ಅದು ಹಣ, ಅದು ಮನುಷ್ಯನ ಅಸ್ಮಿತೆ. ಆದರೆ ನಮ್ಮ ಆಡಳಿತ ಯಂತ್ರದ ಅಧಿಕಾರಿಗಳಿಗೆ ಜನರ ಖಾಸಗಿ ಡೇಟಾ ಎಂದರೆ ಹರಿದು ಬಿಸಾಡುವ ಕಾಗದದ ಚೂರಿನಷ್ಟೇ ಕೀಳು. ಯಾರದೋ ಹೆಸರು, ಅವರ ಫೋನ್ ನಂಬರ್, ಬ್ಯಾಂಕ್ ಖಾತೆಯ ವಿವರಗಳು, ಕೆವೈಸಿ ಮಾಹಿತಿಗಳನ್ನು ಯಾವುದೇ ಮುಲಾಜಿಲ್ಲದೆ ಪಬ್ಲಿಕ್ ವಾಟ್ಸಾಪ್ ಗ್ರೂಪ್ಗಳಲ್ಲಿ ಎಸೆದುಬಿಡುತ್ತಾರೆ. ಮಾಹಿತಿ ತಲುಪಿಸುವ ಧಾವಂತದಲ್ಲಿ ಅಥವಾ ತಮ್ಮ ಕೆಲಸ ಮುಗಿದರೆ ಸಾಕು ಎಂಬ ಅಹಂಕಾರದಲ್ಲಿ ಅಧಿಕಾರಿಗಳು ಮಾಡುತ್ತಿರುವ ಈ ಯಡವಟ್ಟುಗಳಿಂದ ಜನಸಾಮಾನ್ಯರ ಖಾಸಗಿತನ ದಿನಬೆಳಗಾದರೆ ಬೀದಿಯಲ್ಲಿ ಹರಾಜಾಗುತ್ತಿದೆ.
ಇದಕ್ಕೆ ಅತ್ಯಂತ ಕರಾಳ ಉದಾಹರಣೆಯೊಂದು ಉತ್ತರ ಕನ್ನಡ ಜಿಲ್ಲೆಯಲ್ಲಿ ಕಣ್ಣಿಗೆ ರಾಚುವಂತೆ ನಡೆದಿದೆ. ಸರ್ಕಾರಿ ಯೋಜನೆಯೊಂದಕ್ಕೆ ಕೆವೈಸಿ ಆಗದ ರೈತರ ಪಟ್ಟಿಯನ್ನು ಒಳಗೊಂಡಿದ್ದ ಬೃಹತ್ ಎಕ್ಸೆಲ್ ಶೀಟ್ ಅನ್ನು ಇಲಾಖೆಯೊಂದು ಸಾರ್ವಜನಿಕ ವಾಟ್ಸಾಪ್ ಗ್ರೂಪ್ನಲ್ಲಿ ನಿರ್ದಾಕ್ಷಿಣ್ಯವಾಗಿ ತೇಲಿಬಿಟ್ಟಿದೆ. ಆ ಶೀಟ್ ಅನ್ನು ಡೌನ್ಲೋಡ್ ಮಾಡಿ ನೋಡಿದರೆ, ಅದರಲ್ಲಿ ಬರೋಬ್ಬರಿ ಹನ್ನೆರಡು ಸಾವಿರಕ್ಕೂ ಹೆಚ್ಚು ರೈತರ ಅತ್ಯಂತ ಖಾಸಗಿ ಮಾಹಿತಿಗಳಿವೆ. ರೈತರ ಹೆಸರು, ನಿಖರವಾದ ವಿಳಾಸ, ಮೊಬೈಲ್ ನಂಬರ್, ಫಾರ್ಮರ್ ಐಡಿ ಸೇರಿದಂತೆ ಎಲ್ಲವೂ ಓಪನ್ ಸೋರ್ಸ್ ಎಂಬಂತೆ ಲಭ್ಯವಿದೆ. ಇದೊಂದು ಅಕ್ಷಮ್ಯ ಕ್ರಿಮಿನಲ್ ಅಪರಾಧವಲ್ಲದೆ ಮತ್ತೇನು?
ರೈತರ ಖಾಸಗಿ ಮಾಹಿತಿಯನ್ನು ಹೀಗೆ ಬೀದಿಗೆ ತಂದ ಅಧಿಕಾರಿಗಳ ಮನಸ್ಥಿತಿಯನ್ನು ಏನೆಂದು ಕರೆಯಬೇಕು? ತಮ್ಮ ಕುರ್ಚಿಯ ಸುತ್ತಮುತ್ತಲಿನ ರಹಸ್ಯ ಕಡತಗಳನ್ನು ಹದ್ದಿನ ಕಣ್ಣಿನಿಂದ ಕಾಯುವ ಇದೇ ಅಧಿಕಾರಿಗಳಿಗೆ, ಬಡ ರೈತನ ಡೇಟಾ ಎಂದರೆ ಅಷ್ಟು ಅಗ್ಗವಾಯಿತೆ? ಹನ್ನೆರಡು ಸಾವಿರ ರೈತರ ಬದುಕಿನ ವಿವರಗಳನ್ನು ಒಂದು ಎಕ್ಸೆಲ್ ಶೀಟ್ನಲ್ಲಿ ತುಂಬಿ, ಕನಿಷ್ಠ ಪಾಸ್ವರ್ಡ್ ಪ್ರೊಟೆಕ್ಷನ್ ಕೂಡ ಇಲ್ಲದೆ ಅತ್ಯಂತ ಬೇಜವಾಬ್ದಾರಿಯಿಂದ ಸಾರ್ವಜನಿಕವಾಗಿ ಹಂಚಲಾಗಿದೆ. ಸರ್ಕಾರಿ ಕಛೇರಿಯ ಗೌಪ್ಯತೆಯನ್ನು ಕಾಪಾಡಬೇಕಾದವರೇ ಹೀಗೆ ಬೇಲಿಯೇ ಎದ್ದು ಹೊಲ ಮೇಯ್ದಂತೆ ವರ್ತಿಸಿದರೆ, ಜನಸಾಮಾನ್ಯರು ಯಾರನ್ನು ನಂಬಬೇಕು ಎಂಬ ಪ್ರಶ್ನೆಗೆ ಆಡಳಿತ ಯಂತ್ರ ಉತ್ತರಿಸಲೇಬೇಕಿದೆ.
ಈ ಸೋರಿಕೆಯಿಂದ ಆಗುವ ಅಪಾಯದ ಆಳವನ್ನು ಈ ಅಧಿಕಾರಿಗಳು ಅರ್ಥಮಾಡಿಕೊಂಡಿಲ್ಲ. ಕೇವಲ ಫೋನ್ ನಂಬರ್ ಲೀಕ್ ಆಗಿದ್ದರೆ ಅದೊಂದು ಸಾಮಾನ್ಯ ಸ್ಪ್ಯಾಮ್ ಕರೆಗಳಿಗೆ ಸೀಮಿತವಾಗುತ್ತಿತ್ತೇನೋ. ಆದರೆ ಇಲ್ಲಿ ಫಾರ್ಮರ್ ಐಡಿ, ನಿಖರವಾದ ಮನೆ ವಿಳಾಸ ಮತ್ತು ಹೆಸರು ಎಲ್ಲವೂ ಲಭ್ಯವಿದೆ. ಇದರರ್ಥ, ಒಬ್ಬ ಸೈಬರ್ ವಂಚಕ ನೇರವಾಗಿ ರೈತನಿಗೆ ಕರೆ ಮಾಡಿ, ನಾನು ಕೃಷಿ ಇಲಾಖೆಯಿಂದ ಮಾತನಾಡುತ್ತಿದ್ದೇನೆ, ನಿಮ್ಮ ಫಾರ್ಮರ್ ಐಡಿ ಇಂಥದ್ದು, ನಿಮ್ಮ ಊರು ಇಂಥದ್ದು ಎಂದು ನಿಖರವಾಗಿ ಹೇಳಿದಾಗ ಆ ಮುಗ್ಧ ರೈತ ಅದನ್ನು ನೂರಕ್ಕೆ ನೂರು ನಂಬುತ್ತಾನೆ. ಪಿಎಂ ಕಿಸಾನ್ ಹಣ ಅಥವಾ ಬೆಳೆ ವಿಮೆಯ ಹಣ ನಿಮ್ಮ ಖಾತೆಗೆ ಬರಬೇಕಿದೆ, ಕೂಡಲೇ ನಿಮ್ಮ ಬ್ಯಾಂಕ್ ವಿವರ ಕೊಡಿ ಎಂದು ಕೇಳಿದರೆ, ಸರ್ಕಾರವೇ ಕೇಳುತ್ತಿದೆ ಎಂದು ನಂಬಿ ಆ ರೈತ ತಾನೇ ಸ್ವತಃ ತನ್ನ ಬದುಕಿನ ಉಳಿತಾಯವನ್ನು ವಂಚಕರ ಕೈಗಿಡುತ್ತಾನೆ.
ಇದರ ಜೊತೆಗೆ ಭೌತಿಕ ವಂಚನೆಯ ಅಪಾಯವೂ ಇಲ್ಲಿ ಮೈದುಂಬಿ ನಿಂತಿದೆ. ಹನ್ನೆರಡು ಸಾವಿರ ರೈತರ ನಿಖರವಾದ ವಿಳಾಸ ಈಗ ಜಗಜ್ಜಾಹೀರಾಗಿದೆ. ಕೆವೈಸಿ ಆಗಿಲ್ಲ ಎಂಬ ಮಾಹಿತಿಯೂ ವಂಚಕರಿಗೆ ಗೊತ್ತಿರುವುದರಿಂದ, ನಕಲಿ ಐಡಿ ಕಾರ್ಡ್ ಹಾಕಿಕೊಂಡು ಹಳ್ಳಿಗಳಿಗೆ ನುಗ್ಗುವ ದಂಧೆಕೋರರು, ನಿಮ್ಮ ಕೆವೈಸಿ ಮಾಡಿಕೊಡುತ್ತೇವೆ ಎಂದು ರೈತರ ಮನೆ ಬಾಗಿಲಿಗೆ ಹೋಗಿ ಅವರಿಂದ ಹಣ ಸುಲಿಗೆ ಮಾಡುವ ಅಥವಾ ಅವರ ಹೆಬ್ಬೆಟ್ಟಿನ ಗುರುತು ಪಡೆದು ಬಯೋಮೆಟ್ರಿಕ್ ವಂಚನೆ ಮಾಡುವ ಸಾಧ್ಯತೆಗಳನ್ನು ತಳ್ಳಿಹಾಕುವಂತಿಲ್ಲ. ಡಿಜಿಟಲ್ ಇಂಡಿಯಾದ ಹೆಸರಿನಲ್ಲಿ ಹಳ್ಳಿಗಳ ಮುಗ್ಧ ಜನರನ್ನು ವಂಚಕರ ಬಾಯಿಗೆ ಆಹಾರವಾಗಿ ಇಡುವ ಈ ಕೃತ್ಯಕ್ಕೆ ನೇರವಾಗಿ ಆ ವಾಟ್ಸಾಪ್ ಗ್ರೂಪ್ ಅಡ್ಮಿನ್ ಮತ್ತು ಆ ಕಡತವನ್ನು ಹಂಚಿದ ಅಧಿಕಾರಿಯೇ ಹೊಣೆಗಾರನಾಗುತ್ತಾನೆ.
ಮಾಹಿತಿ ತಂತ್ರಜ್ಞಾನ ಕಾಯ್ದೆಯಡಿ ಇದೊಂದು ಗಂಭೀರ ಸ್ವರೂಪದ ಸೈಬರ್ ಅಪರಾಧವಾಗಿದೆ. ಯಾವುದೇ ಒಂದು ಡೇಟಾವನ್ನು ಹಂಚುವಾಗ ಕನಿಷ್ಠ ಪಕ್ಷ ಮೊಬೈಲ್ ನಂಬರ್ ಅಥವಾ ಆಧಾರ್ ನಂಬರ್ ನ ಕೊನೆಯ ನಾಲ್ಕು ಅಂಕಿಗಳು ಮಾತ್ರ ಕಾಣುವಂತೆ ಮಾಸ್ಕ್ ಮಾಡುವ ಸಾಮಾನ್ಯ ತಾಂತ್ರಿಕ ಜ್ಞಾನವೂ ಈ ಇಲಾಖೆಗೆ ಇಲ್ಲದಿರುವುದು ನಾಚಿಕೆಗೇಡಿನ ಸಂಗತಿ. ವಾಟ್ಸಾಪ್ ಎನ್ನುವುದು ಸರ್ಕಾರದ ಅಧಿಕೃತ ಸರ್ವರ್ ಅಲ್ಲ. ಅದೊಂದು ವಿದೇಶಿ ಖಾಸಗಿ ಕಂಪನಿಯ ಆ್ಯಪ್. ಅಂತಹ ಒಂದು ಪ್ಲಾಟ್ಫಾರ್ಮ್ ಮೇಲೆ ಸರ್ಕಾರದ ಇಡೀ ಡೇಟಾಬೇಸ್ ಅನ್ನು ಅನ್ಎನ್ಕ್ರಿಪ್ಟೆಡ್ ರೂಪದಲ್ಲಿ ಅಪ್ಲೋಡ್ ಮಾಡುವುದು ಸರ್ಕಾರದ ಸೈಬರ್ ಭದ್ರತಾ ನೀತಿಗಳ ಸ್ಪಷ್ಟ ಉಲ್ಲಂಘನೆಯಾಗಿದೆ.
ಈಗ ಆ ಹನ್ನೆರಡು ಸಾವಿರ ರೈತರ ಭವಿಷ್ಯವೇನು? ಕೇವಲ ವಾಟ್ಸಾಪ್ ಗ್ರೂಪ್ನಿಂದ ಆ ಮೆಸೇಜ್ ಡಿಲೀಟ್ ಮಾಡಿದ ತಕ್ಷಣ ಸಮಸ್ಯೆ ಬಗೆಹರಿಯುವುದಿಲ್ಲ. ಈಗಾಗಲೇ ಆ ಎಕ್ಸೆಲ್ ಶೀಟ್ ಸಾವಿರಾರು ಜನರ ಮೊಬೈಲ್ ಸೇರಿದೆ, ಡಾರ್ಕ್ ವೆಬ್ಗಳಲ್ಲಿ ಮಾರಾಟಕ್ಕೂ ಸಿದ್ಧವಾಗಿರಬಹುದು. ಸರ್ಕಾರ ಈಗಲಾದರೂ ಎಚ್ಚೆತ್ತು, ಡೇಟಾ ಸೋರಿಕೆಯಾಗಿರುವ ಆ ಎಲ್ಲಾ ರೈತರಿಗೂ ಅಧಿಕೃತವಾಗಿ ಈ ವಿಚಾರವನ್ನು ತಿಳಿಸಿ, ಮುಂದಿನ ದಿನಗಳಲ್ಲಿ ಬರಬಹುದಾದ ನಕಲಿ ಕರೆಗಳ ಬಗ್ಗೆ ಅವರನ್ನು ಎಚ್ಚರಿಸುವ ತುರ್ತು ಕೆಲಸ ಮಾಡಬೇಕು. ಜೊತೆಗೆ, ಈ ಅನಾಹುತಕ್ಕೆ ಕಾರಣರಾದ ಅಧಿಕಾರಿಗಳಿಗೆ ನಿಜವಾದಿ ಪಾಠ ಕಲಿಸುವ ಅಗತ್ಯವಿದೆ.
ಇಂತಹ ಸೂಕ್ಷ್ಮ ವಿಚಾರಗಳಲ್ಲಿ ತಪ್ಪು ಮಾಡುವ ಸರ್ಕಾರಿ ಅಧಿಕಾರಿಗಳಿಗೆ ಬುದ್ಧಿ ಹೇಳುವವರು ಯಾರು ಎಂಬ ಪ್ರಶ್ನೆ ಈಗ ಪ್ರಬಲವಾಗಿ ಕಾಡುತ್ತಿದೆ. ಇದೇ ಹನ್ನೆರಡು ಸಾವಿರ ಜನರ ಡೇಟಾವನ್ನು ಯಾವುದಾದರೂ ಖಾಸಗಿ ಟೆಕ್ ಕಂಪನಿ, ಬ್ಯಾಂಕ್ ಅಥವಾ ಆ್ಯಪ್ ಕಂಪನಿ ಸೋರಿಕೆ ಮಾಡಿದ್ದರೆ ಇಷ್ಟೊತ್ತಿಗೆ ದೇಶಾದ್ಯಂತ ದೊಡ್ಡ ರಂಪಾಟವೇ ನಡೆಯುತ್ತಿತ್ತು. ಕಂಪನಿಯ ಮೇಲೆ ಇಡಿ, ಸಿಬಿಐ ದಾಳಿಗಳು ನಡೆಯುತ್ತಿದ್ದವು, ಜೈಲು ಶಿಕ್ಷೆಯಾಗುತ್ತಿತ್ತು. ಆದರೆ ಸರ್ಕಾರಿ ಅಧಿಕಾರಿಗಳು ಮಾಡಿದಾಗ ಮಾತ್ರ ಇಡೀ ವ್ಯವಸ್ಥೆ ಜಾಣಕಿವುಡು ಪ್ರದರ್ಶಿಸುತ್ತದೆ. ಸರ್ಕಾರದ ಮಟ್ಟದಲ್ಲಿ ಡೇಟಾ ಪ್ರೈವೆಸಿಗೆ ಇರುವ ಬೆಲೆ ಇಷ್ಟೇನಾ?
ಜನಸಾಮಾನ್ಯರಿಗೆ ಸೈಬರ್ ಕ್ರೈಮ್ ಬಗ್ಗೆ, ಒಟಿಪಿ ಹಂಚಬೇಡಿ ಎಂದು ಪಾಠ ಮಾಡುವ ಸರ್ಕಾರ, ಮೊದಲು ತನ್ನದೇ ಅಧಿಕಾರಿಗಳಿಗೆ, ಗುಮಾಸ್ತರಿಗೆ ಈ ಬಗ್ಗೆ ಕಠಿಣ ತರಬೇತಿ ನೀಡಬೇಕಿದೆ. ಕಡತಗಳನ್ನು ಕಂಕುಳಲ್ಲಿ ಇಟ್ಟುಕೊಂಡು, ಟೇಬಲ್ ಕೆಳಗೆ ವ್ಯವಹರಿಸುತ್ತಿದ್ದ ಕಾಲದಿಂದ ಇದ್ದಕ್ಕಿದ್ದಂತೆ ಡಿಜಿಟಲ್ ವ್ಯವಸ್ಥೆಗೆ ಬದಲಾಗಿರುವ ಈ ಅಧಿಕಾರಿ ವರ್ಗಕ್ಕೆ, ಡೇಟಾ ಸುರಕ್ಷತೆಯ ಮಹತ್ವವೇ ತಿಳಿದಿಲ್ಲ. ಡಿಜಿಟಲ್ ಪ್ಲಾಟ್ಫಾರ್ಮ್ಗಳನ್ನು ಹೇಗೆ ಬಳಸಬೇಕು, ಯಾವ ಮಾಹಿತಿಯನ್ನು ಪಬ್ಲಿಕ್ ಡೊಮೇನ್ನಲ್ಲಿ ಹಂಚಬೇಕು ಮತ್ತು ಯಾವುದನ್ನು ಅತ್ಯಂತ ಗುಪ್ತವಾಗಿ ಕಾಯ್ದಿಟ್ಟುಕೊಳ್ಳಬೇಕು ಎಂಬ ಬಗ್ಗೆ ಯಾವ ಸ್ಪಷ್ಟ ಮಾರ್ಗಸೂಚಿಗಳೂ ಇಲ್ಲದಿರುವುದೇ ಈ ದುರಂತಕ್ಕೆ ಕಾರಣ.
ಸಾರ್ವಜನಿಕರ ಖಾಸಗಿ ಮಾಹಿತಿಯನ್ನು ರಕ್ಷಿಸುವುದು ಯಾವುದೇ ನಾಗರಿಕ ಸರ್ಕಾರದ ಕನಿಷ್ಠ ಮತ್ತು ಮೂಲಭೂತ ಜವಾಬ್ದಾರಿ. ಕಲ್ಯಾಣ ಯೋಜನೆಗಳ ನೆಪದಲ್ಲಿ ಜನರಿಂದ ಸಂಗ್ರಹಿಸುವ ಡೇಟಾವನ್ನು ಹೀಗೆ ಬೇಜವಾಬ್ದಾರಿಯಿಂದ ನಿರ್ವಹಿಸುವುದು ಪ್ರಜಾಪ್ರಭುತ್ವದ ವಿಡಂಬನೆ. ಕೇವಲ ಒಂದು ವಾಟ್ಸಾಪ್ ಗ್ರೂಪ್ ಮೂಲಕ ಇಷ್ಟು ಸುಲಭವಾಗಿ ಜನರ ಖಾಸಗಿ ವಿವರಗಳು ಸೋರಿಕೆಯಾಗುತ್ತಿವೆ ಎಂದರೆ, ನಮ್ಮ ಆಡಳಿತ ವ್ಯವಸ್ಥೆ ಎಷ್ಟೊಂದು ಶಿಥಿಲವಾಗಿದೆ ಎಂಬುದು ಸ್ಪಷ್ಟವಾಗುತ್ತದೆ. ಇದು ಕೇವಲ ಉತ್ತರ ಕನ್ನಡ ಜಿಲ್ಲೆಗೆ ಸೀಮಿತವಾದ ಸಮಸ್ಯೆಯಲ್ಲ, ಇಡೀ ರಾಜ್ಯದ ಮೂಲೆ ಮೂಲೆಯಲ್ಲೂ ಪ್ರತಿದಿನ ಇಂತಹ ನೂರಾರು ಡೇಟಾ ಸೋರಿಕೆಗಳು ನಮ್ಮ ಕಣ್ಣ ಮುಂದೆಯೇ ರಾಜಾರೋಷವಾಗಿ ನಡೆಯುತ್ತಿವೆ.
ಸರ್ಕಾರದ ಮಟ್ಟದಲ್ಲಿ ಸಾರ್ವಜನಿಕ ಡೇಟಾ ನಿರ್ವಹಣೆ ಮತ್ತು ಹಂಚಿಕೆಯ ಬಗ್ಗೆ ತಕ್ಷಣವೇ ಕಠಿಣ ಕಾನೂನುಗಳು ಜಾರಿಗೆ ಬರಬೇಕಾದ ತುರ್ತು ಅಗತ್ಯವಿದೆ. ಸರ್ಕಾರಿ ಇಲಾಖೆಗಳು ವಾಟ್ಸಾಪ್ ಅಥವಾ ಟೆಲಿಗ್ರಾಮ್ನಂತಹ ಖಾಸಗಿ ಮತ್ತು ಮೂರನೇ ವ್ಯಕ್ತಿಯ ಆ್ಯಪ್ಗಳನ್ನು ಅಧಿಕೃತ ಸಂವಹನಕ್ಕೆ ಹಾಗೂ ಫಲಾನುಭವಿಗಳ ಮಾಹಿತಿ ಹಂಚಿಕೆಗೆ ಬಳಸುವುದನ್ನು ತಕ್ಷಣವೇ ನಿಷೇಧಿಸಬೇಕು. ಇದರ ಬದಲು, ಫಲಾನುಭವಿಗಳಿಗೆ ನೇರವಾಗಿ ಎಸ್ಎಂಎಸ್ ಕಳುಹಿಸುವ ಅಥವಾ ಅತ್ಯಂತ ಸುರಕ್ಷಿತವಾದ ಪ್ರತ್ಯೇಕ ಸರ್ಕಾರಿ ಪೋರ್ಟಲ್ ಮೂಲಕ ಮಾತ್ರ ಮಾಹಿತಿ ತಲುಪಿಸುವ ವ್ಯವಸ್ಥೆ ಕಡ್ಡಾಯವಾಗಬೇಕು.
ಖಾಸಗಿ ಮಾಹಿತಿ ಸೋರಿಕೆ ಮಾಡುವ ಅಧಿಕಾರಿಗಳ ವಿರುದ್ಧ ಕೇವಲ ವರ್ಗಾವಣೆ ಅಥವಾ ನೋಟಿಸ್ ನೀಡುವಂತಹ ನಾಟಕೀಯ ಕ್ರಮಗಳು ಸಾಲದು. ಬದಲಾಗಿ, ನಿರ್ದಾಕ್ಷಿಣ್ಯವಾದ ಕ್ರಿಮಿನಲ್ ಮೊಕದ್ದಮೆಗಳನ್ನು ದಾಖಲಿಸುವ ಕಾನೂನುಗಳು ಬರಬೇಕು. ಜನರ ಡೇಟಾವನ್ನು ನಿರ್ಲಕ್ಷ್ಯದಿಂದ ಹಂಚುವವರ ಮೇಲೆ ಐಟಿ ಆ್ಯಕ್ಟ್ ಅಡಿಯಲ್ಲಿ ಪ್ರಕರಣ ದಾಖಲಿಸಿ, ಜೈಲಿಗೆ ಕಳುಹಿಸುವಂತಹ ಕಠಿಣ ನಿಯಮಗಳು ಜಾರಿಯಾದಾಗ ಮಾತ್ರ ಈ ಉಡಾಫೆಯ ಆಡಳಿತ ಯಂತ್ರಕ್ಕೆ ಬಿಸಿ ಮುಟ್ಟುತ್ತದೆ. ಡೇಟಾ ಸುರಕ್ಷತಾ ಕಾಯ್ದೆಯು ಕೇವಲ ಖಾಸಗಿ ಸಂಸ್ಥೆಗಳಿಗೆ ಮಾತ್ರವಲ್ಲ, ಸರ್ಕಾರಿ ಇಲಾಖೆಗಳಿಗೂ ಸಮಾನವಾಗಿ ಮತ್ತು ಕಟ್ಟುನಿಟ್ಟಾಗಿ ಅನ್ವಯವಾಗಬೇಕು.
ಜನಸಾಮಾನ್ಯರು ಸರ್ಕಾರದ ಮೇಲಿನ ಅಪಾರ ನಂಬಿಕೆಯಿಂದ ಮತ್ತು ಯೋಜನೆಗಳ ಅನಿವಾರ್ಯತೆಯಿಂದ ತಮ್ಮ ಅತ್ಯಂತ ಸೂಕ್ಷ್ಮ ಮಾಹಿತಿಯನ್ನು ನೀಡುತ್ತಾರೆ. ಆ ನಂಬಿಕೆಯನ್ನು ಒಡೆದು, ಅವರ ಬೆನ್ನಿಗೆ ಚೂರಿ ಹಾಕುವ ಹಕ್ಕು ಯಾರಿಗೂ ಇಲ್ಲ. ಡೇಟಾ ಕಳವು ಎನ್ನುವುದು ಭೌತಿಕ ಕಳ್ಳತನಕ್ಕಿಂತಲೂ ಸಾವಿರ ಪಟ್ಟು ಹೆಚ್ಚು ಅಪಾಯಕಾರಿ ಎಂಬುದನ್ನು ಆಡಳಿತ ಯಂತ್ರ ಎಚ್ಚೆತ್ತುಕೊಳ್ಳುವ ಕಾಲ ಮೀರಿದೆ. ಅಧಿಕಾರಿಗಳ ಡಿಜಿಟಲ್ ದರ್ಬಾರ್ಗೆ ಮತ್ತು ಅವರ ಬೇಜವಾಬ್ದಾರಿಗೆ ತಕ್ಷಣವೇ ಕಡಿವಾಣ ಬೀಳಲೇಬೇಕು.
ಇದು ಟೆಕ್ ವೈದ್ಯ ಕಾಳಜಿ
ನೀವು ಇರುವ ಗ್ರಾಮ ಪಂಚಾಯತಿ, ಪಡಿತರ ಚೀಟಿ, ಕೃಷಿ ಇಲಾಖೆ ಅಥವಾ ಯಾವುದೇ ಸರ್ಕಾರಿ ವಾಟ್ಸಾಪ್ ಗ್ರೂಪ್ಗಳಲ್ಲಿಯೂ ಹೀಗೆ ಜನರ ವೈಯಕ್ತಿಕ ಡೇಟಾವನ್ನು ಒಳಗೊಂಡ ಪಿಡಿಎಫ್ ಅಥವಾ ಎಕ್ಸೆಲ್ ಶೀಟ್ಗಳನ್ನು ಶೇರ್ ಮಾಡಲಾಗುತ್ತಿದೆಯೇ ಎಂಬುದನ್ನು ಇಂದೇ ಪರಿಶೀಲಿಸಿ. ಹೌದು ಎಂದಾದರೆ, ತಕ್ಷಣವೇ ಸಂಬಂಧಪಟ್ಟ ಅಧಿಕಾರಿಗಳನ್ನು ಪ್ರಶ್ನಿಸಿ, ಆ ಡೇಟಾವನ್ನು ಡಿಲೀಟ್ ಮಾಡಲು ಕಟ್ಟುನಿಟ್ಟಾಗಿ ಒತ್ತಾಯಿಸಿ. ನಿಮ್ಮ ಮತ್ತು ನಿಮ್ಮವರ ಡಿಜಿಟಲ್ ಹಕ್ಕುಗಳಿಗಾಗಿ ಧ್ವನಿ ಎತ್ತಿ ಹಾಗೂ ಈ ಬಿಸಿಬಿಸಿ ಚರ್ಚೆಯನ್ನು ಸರ್ಕಾರದ ಉನ್ನತ ಮಟ್ಟಕ್ಕೆ ತಲುಪಿಸಲು ಈ ಲೇಖನವನ್ನು ಪ್ರತಿಯೊಬ್ಬರಿಗೂ ಶೇರ್ ಮಾಡಿ ವ್ಯವಸ್ಥೆಯನ್ನು ಬಡಿದೆಬ್ಬಿಸಿ.
ಈ ಲೇಖನಗಳನ್ನೂ ಓದಿ
❤️ ನಿರಾಧಾರವಾದ ಆಧಾರ್!: ಸರ್ವ ರೋಗ ನಿವಾರಿಣಿ ಅಂದವರು ಈಗ ಸೈಡ್ ಎಫೆಕ್ಟ್ ಬಗ್ಗೆ ಮಾತಾಡ್ತಿಲ್ಲವೇಕೆ?
❤️ ನೀರಿನಲ್ಲಿ ಬಿದ್ದ ಫೋನ್: ಅಕ್ಕಿ ಡಬ್ಬದಲ್ಲಿ ಇಡುವುದು ಸರಿಯೇ? ವಿಜ್ಞಾನ ಹೇಳುವ ಸತ್ಯವೇನು?
❤️ ಎಐ ಎಐ ಹೂಡಿಕೆಯ ಮಹಾ ಸಂಗ್ರಾಮ: 450 ಬಿಲಿಯನ್ ಡಾಲರ್ ಎಲ್ಲಿಗೆ ಹೋಗುತ್ತಿದೆ?
❤️ ಕ್ರೆಡಿಟ್ ಕಾರ್ಡ್ ಲಿಮಿಟ್ ಹೆಚ್ಚಿಸ್ತೀವಿ ಅಂತ ಕರೆ ಬಂದ್ರೆ ಹುಷಾರ್!
🟢 ನಿರಂತರ ಅಪ್ಡೇಟ್ ಪಡೆಯಲು ನಮ್ಮ ವಾಟ್ಸಾಪ್ ಚಾನೆಲ್ ಫಾಲೋ ಮಾಡಿ JOIN ➤
🛒 ಆನ್ಲೈನ್ ಶಾಪಿಂಗ್
100%👌👌. ಈ ಲೇಖನ ಓದಿದ ಮೇಲೆ ಒಂದು ಘಟನೆ ಹಂಚಿಕೊಳ್ಳಲೇ ಬೇಕು. ಸುಮಾರು ಹತ್ತು ವರ್ಷಗಳ ಹಿಂದಿನ ಘಟನೆ.... ಸಿರ್ಸಿ ವಿಕಾಸ್ ಆಶ್ರಮದಲ್ಲಿರುವ ನಗರಸಭೆ ಕಟ್ಟಡದಲ್ಲಿ ಆಧಾರ್ ಬಯೋ ಮೆಟ್ರಿಕ್ ಮಾಡಿಸಿ ಆರು ತಿಂಗಳು ಕಳೆದರೂ ಆಧಾರ್ ಕಾರ್ಡ್ ಬರಲೇ ಇಲ್ಲ. ಯಾವುದೊ ಕಾರಣಕ್ಕೆ ನನಗೆ ಆಧಾರ್ ಅನಿವಾರ್ಯವಾಗಿತ್ತು. ಕೇಳಿದಾಗ ಬರ್ಬಹುದು ಎನ್ನುವ ಉತ್ತರ. ಕೊನೆಗೆ ನಾನು ಆಧಾರ ಬದಲಿಗೆ ಅವರು ಕೊಟ್ಟ ಏಕ್ ನೊಲೆಜ್ ಪ್ರತಿಯನ್ನೇ ಪರಿಗಣಿಸಬೇಕು ಎಂದು ಪತ್ತು ಹಿಡಿದೆ. ಒಪ್ಪದಿದ್ದಾಗ ವಿಷಯ ತಹಸೀಲ್ದಾರ್ ಕೋಣೆ ತಲುಪಿ ಅಲ್ಲೊಂದಿಷ್ಟು ಚರ್ಚೆಯಾಯಿತು. ವಿಷಯ ಏನೆಂದರೆ ಹೊರಗುತ್ತಿಗೆ ಮೇಲೆ ಕೆಲಸ ಮಾಡುತ್ತಿದ್ದವ ಸುಮಾರು ಜನರ ಡೇಟಾ ( ಬಯೋ ಮೆಟ್ರಿಕ್ ಸೇರಿ ) ಮತ್ತು ಲ್ಯಾಪ್ ಟಾಪ್ ಜೊತೆ ನಾಪತ್ತೆ!!! ಆ ಕುರಿತು ಯಾವುದೇ ಕ್ರಮವೂ ಆಗಿರಲಿಲ್ಲ. ನಾನು ನನ್ನ ವಿಷಯ ಬಿಟ್ಟು ಇದೇ ವಿಷಯವನ್ನೇ ಕೇಂದ್ರೀಕರಿಸಿ ನನ್ನ ಬಯೋ ಮೆಟ್ರಿಕ್ ದುರ್ಬಳಕೆಯಾದಲ್ಲಿ ನೀವೇ ಜವಾಬ್ದಾರಿ, ನಾನು ಈ ವಿಷಯವನ್ನು ಕೇಂದ್ರ ಸರ್ಕಾರ್ ಮತ್ತು ಆಧಾರ್ ಆತೋರಿಟಿಗೂ ದೂರು ಕೊಡುತ್ತೇನೇಂದೂ, ಯಾವುದೇ ಕಾರಣಕ್ಕೂ ಇನ್ನೊಮ್ಮೆ ಬಯೋ ಮೆಟ್ರಿಕ್ ಮಾಡಿಸುವುದಿಲ್ಲವೆಂದು ಹಠಕ್ಕೆ ಬಿದ್ದಾಗ, ತಹಸೀಲ್ದಾರ್ ಅವರ ಶರಾ ದ ಮೇರೆಗೆ ಆಧಾರ್ ಇಲ್ಲದೆ ಕೆಲಸ ಆಗಿದ್ದಿದೆ. ಸರ್ಕಾರಿ ವ್ಯವಸ್ಥೆಯಲ್ಲಂತು ಡೇಟಾ ಸೆಕ್ಯೂರಿಟಿ ಎನ್ನುವುದೇ ಇಲ್ಲವಾದರೆ ಪರಿಸ್ಥಿತಿ. ದೇವರೇ ನಮ್ಮ ಸೆಕ್ಯೂರಿಟಿ ಮಾಡಬೇಕು!!!
ಬ್ರೇಕಿಂಗ್ ನ್ಯೂಸ್, ಟ್ರೆಂಡಿಂಗ್ ಸ್ಟೋರಿ ಆಳವಾದ ವಿಶ್ಲೇಷಣೆಗಳನ್ನು ನಿರಂತರವಾಗಿ ಪಡೆಯಲು ಉಚಿತವಾಗಿ ಚಂದಾದಾರರಾಗಿ.
