ವಿಜ್ಞಾನವಿಲ್ಲದೇ ತಂತ್ರಜ್ಞಾನ ಅಪೂರ್ಣ: ಹಾರ್ಡ್‌ವೇರ್ ರಂಗದ ಒಳನೋಟಗಳು

ಮೂಲ ತತ್ವಗಳ ಮೇಲೆ ಭವಿಷ್ಯದ ನಿರ್ಮಾಣ: ಡಾ. ಚೇತನ್ ಸಿ.ಜೆ ಅವರೊಂದಿಗೆ ಸಂದರ್ಶನ

ಸಂದರ್ಶನ: ರಾಹುಲ್ ಪಿ.
ಭಾರತದ ತಂತ್ರಜ್ಞಾನ ವಲಯವು ಸಾಫ್ಟ್‌ವೇರ್ ಕ್ಷೇತ್ರದಲ್ಲಿ ಜಾಗತಿಕ ಮನ್ನಣೆ ಗಳಿಸಿದ್ದರೂ, ಹಾರ್ಡ್‌ವೇರ್ ಮತ್ತು ಪ್ರೊಡಕ್ಟ್ ಇಂಜಿನಿಯರಿಂಗ್ ವಿಭಾಗದಲ್ಲಿ ಇನ್ನೂ ಮಹತ್ವದ ಹೆಜ್ಜೆಗಳನ್ನು ಇಡಬೇಕಿದೆ. ಮಾರುಕಟ್ಟೆಯಲ್ಲಿ ಕಾಣಸಿಗುವ ಬಹುತೇಕ ಯಂತ್ರೋಪಕರಣಗಳು ಅಸ್ತಿತ್ವದಲ್ಲಿರುವ ವಿದೇಶಿ ವಿನ್ಯಾಸಗಳ ನಕಲು ಅಥವಾ 'ರಿವರ್ಸ್ ಇಂಜಿನಿಯರಿಂಗ್' ಫಲಿತಾಂಶಗಳಾಗಿವೆಯೇ ಹೊರತು, ಮೂಲಭೂತ ಸಂಶೋಧನೆಯಿಂದ ಹುಟ್ಟಿದವುಗಳಲ್ಲ ಎಂಬುದು ಕಟುಸತ್ಯ. ಒಂದು ಉತ್ಪನ್ನವು ದೀರ್ಘಕಾಲ ಬಾಳಿಕೆ ಬರಬೇಕಾದರೆ ಮತ್ತು ನೈಜ ಸಮಸ್ಯೆಗೆ ಪರಿಹಾರ ನೀಡಬೇಕಾದರೆ, ಅದರ ಹಿಂದೆ ಬಲವಾದ ವೈಜ್ಞಾನಿಕ ತಳಹದಿ ಅತ್ಯಗತ್ಯ.
ಯಾವುದೇ ಒಂದು ತಂತ್ರಜ್ಞಾನ ರೂಪುಗೊಳ್ಳುವ ಮೊದಲು 'ಏಕೆ' ಮತ್ತು 'ಹೇಗೆ' ಎಂಬ ಪ್ರಶ್ನೆಗಳಿಗೆ ಮೂಲ ವಿಜ್ಞಾನದಲ್ಲಿ ಉತ್ತರ ಕಂಡುಕೊಳ್ಳಬೇಕು. ಭೌತಶಾಸ್ತ್ರ, ರಸಾಯನಶಾಸ್ತ್ರ ಮತ್ತು ಗಣಿತದ ಸಮೀಕರಣಗಳನ್ನು ಇಂಜಿನಿಯರಿಂಗ್‌ಗೆ ಅಳವಡಿಸಿದಾಗ ಮಾತ್ರ ನಿಖರವಾದ ಫಲಿತಾಂಶ ಪಡೆಯಲು ಸಾಧ್ಯ. ಈ 'ಫರ್ಸ್ಟ್ ಪ್ರಿನ್ಸಿಪಲ್' ವಿಧಾನವನ್ನು ಅನುಸರಿಸಿದಾಗ ಮಾತ್ರ ನಮ್ಮ ದೇಶೀಯ ಉತ್ಪಾದನಾ ವಲಯ ಸ್ವಾವಲಂಬಿಯಾಗಲು ಸಾಧ್ಯ. ಆದರೆ, ಪ್ರಾಯೋಗಿಕವಾಗಿ ಲ್ಯಾಬ್‌ಗಳಲ್ಲಿ ನಡೆಯುವ ಸಂಶೋಧನೆಗೂ, ಕಾರ್ಖಾನೆಗಳಲ್ಲಿ ನಡೆಯುವ ಉತ್ಪಾದನೆಗೂ ದೊಡ್ಡ ಕಂದಕವಿದೆ.
ಈ ಕಂದಕವನ್ನು ಮುಚ್ಚುವ ನಿಟ್ಟಿನಲ್ಲಿ ಮತ್ತು 'ವಿಜ್ಞಾನ ಮತ್ತು ಕೇವಲ ವಿಜ್ಞಾನ' ಎಂಬ ತತ್ವದಡಿ ಕಾರ್ಯನಿರ್ವಹಿಸುತ್ತಿರುವ ಸಂಸ್ಥೆ ಸಿಎ ಲ್ಯಾಬ್ಸ್. ಕೃಷಿ, ಆಹಾರ ಸಂಸ್ಕರಣೆ, ಮತ್ತು ಫಾರ್ಮಾಸ್ಯುಟಿಕಲ್ಸ್ ಕ್ಷೇತ್ರಗಳಲ್ಲಿ ಸಂಕೀರ್ಣವಾದ ಸಮಸ್ಯೆಗಳಿಗೆ ಸರಳ ಹಾಗೂ ವೈಜ್ಞಾನಿಕ ಪರಿಹಾರಗಳನ್ನು ರೂಪಿಸುವುದು ಇಂದಿನ ತುರ್ತುಗಳಲ್ಲಿ ಒಂದಾಗಿದೆ. ಕೇವಲ ವಾಣಿಜ್ಯ ಲಾಭಕ್ಕಾಗಿ ಯಂತ್ರಗಳನ್ನು ತಯಾರಿಸದೆ, ಸುಸ್ಥಿರತೆ ಮತ್ತು ನಿಖರತೆಯನ್ನು ಕಾಯ್ದುಕೊಳ್ಳುವುದು ಈ ಕ್ಷೇತ್ರದ ದೊಡ್ಡ ಸವಾಲು.
ಭಾರತದಲ್ಲಿ ಹಾರ್ಡ್‌ವೇರ್ ಇಕೋಸಿಸ್ಟಮ್ ಅಥವಾ ಪೂರಕ ವ್ಯವಸ್ಥೆಯನ್ನು ಕಟ್ಟುವುದು ಸುಲಭದ ಮಾತಲ್ಲ. ನುರಿತ ಕುಶಲಕರ್ಮಿಗಳ ಕೊರತೆ, ಕಚ್ಚಾ ವಸ್ತುಗಳ ಗುಣಮಟ್ಟದಲ್ಲಿನ ವ್ಯತ್ಯಾಸ ಮತ್ತು ಸಂಶೋಧನಾ ಮನೋಭಾವದ ಕೊರತೆಗಳು ಉದ್ಯಮಿಗಳನ್ನು ಕಾಡುವ ಪ್ರಮುಖ ಸಮಸ್ಯೆಗಳು. ಇವುಗಳನ್ನು ಮೀರಿ ನಿಲ್ಲಲು ಕೇವಲ ಬಂಡವಾಳವಿದ್ದರೆ ಸಾಲದು, ಅಲ್ಲಿ ತಾಳ್ಮೆ ಮತ್ತು ನಿರಂತರ ತರಬೇತಿಯ ಅಗತ್ಯವಿರುತ್ತದೆ.
ಶಿಕ್ಷಣ ವ್ಯವಸ್ಥೆಯು ಕೂಡ ವಿದ್ಯಾರ್ಥಿಗಳನ್ನು ಕೇವಲ ಪರೀಕ್ಷೆಗಳಿಗೆ ಸಿದ್ಧಪಡಿಸದೆ, ಸಮಸ್ಯೆಗಳನ್ನು ಬಗೆಹರಿಸುವ 'ಪ್ರಾಬ್ಲಮ್ ಸಾಲ್ವಿಂಗ್' ಕೌಶಲ್ಯಗಳತ್ತ ಒತ್ತು ನೀಡಬೇಕಿದೆ. ಉದ್ಯಮ ಮತ್ತು ಅಕಾಡೆಮಿಕ್ ರಂಗದ ನಡುವೆ ನಿರಂತರ ಸಂವಾದ ನಡೆದಾಗ ಮಾತ್ರ ಮುಂದಿನ ತಲೆಮಾರಿನ ತಂತ್ರಜ್ಞರು ರೂಪುಗೊಳ್ಳಲು ಸಾಧ್ಯ.
ಈ ಹಿನ್ನೆಲೆಯಲ್ಲಿ, ಎರಡು ದಶಕಗಳಿಗೂ ಹೆಚ್ಚು ಕಾಲ ಸಂಶೋಧನೆ ಮತ್ತು ಉತ್ಪನ್ನ ಅಭಿವೃದ್ಧಿ ಕ್ಷೇತ್ರದಲ್ಲಿ ತೊಡಗಿಸಿಕೊಂಡಿರುವ, ಸಿಎ ಲ್ಯಾಬ್ಸ್‌ನ ಸಂಸ್ಥಾಪಕರಾದ ಡಾ. ಚೇತನ್ ಸಿ.ಜೆ ಅವರು 'ಟೆಕ್ ವೈದ್ಯ'ದೊಂದಿಗೆ ಮಾತನಾಡಿದ್ದಾರೆ. ವಿಜ್ಞಾನ ಆಧಾರಿತ ಉತ್ಪಾದನೆ, ಭಾರತೀಯ ಹಾರ್ಡ್‌ವೇರ್ ರಂಗದ ಸವಾಲುಗಳು ಮತ್ತು ಭವಿಷ್ಯದ ತಂತ್ರಜ್ಞಾನಗಳ ಕುರಿತು ಅವರು ಹಂಚಿಕೊಂಡಿರುವ ವಿಚಾರಗಳು ಇಲ್ಲಿವೆ.

ರಾಹುಲ್ ಪಿ.: ದಯವಿಟ್ಟು ನಿಮ್ಮ ಪರಿಚಯ ಮಾಡಿಕೊಳ್ಳಿ ಮತ್ತು ಸಿಎ ಲ್ಯಾಬ್ಸ್‌ನಲ್ಲಿ ನಿಮ್ಮ ಪಾತ್ರವೇನು ಎಂಬುದನ್ನು ವಿವರಿಸಿ?
ಡಾ. ಚೇತನ್ ಸಿ. ಜೆ: ನಾನು ಡಾ. ಚೇತನ್ ಸಿ. ಜೆ, ಸಿಎ ಲ್ಯಾಬ್ಸ್‌ನ ಸ್ಥಾಪಕ. ನಾನು ಇಲ್ಲಿನ ಸಂಶೋಧನೆ ಮತ್ತು ಅಭಿವೃದ್ಧಿ (R&D) ಹಾಗೂ ಕಾರ್ಯಾಚರಣೆಯ ಚಟುವಟಿಕೆಗಳನ್ನು ನೋಡಿಕೊಳ್ಳುತ್ತೇನೆ. ನಮ್ಮ ಕೆಲಸವು ಪ್ರಮುಖವಾಗಿ ಆಹಾರ, ಫಾರ್ಮಾಸ್ಯುಟಿಕಲ್ಸ್ ಮತ್ತು ಮೆಟಲ್ಸ್ ಇಂಜಿನಿಯರಿಂಗ್ ಕ್ಷೇತ್ರಗಳಲ್ಲಿ ಹರಡಿಕೊಂಡಿದೆ ಮತ್ತು ಇತ್ತೀಚೆಗೆ ನಾವು ಬಯೋಮಾಸ್ ಅಥವಾ ಜೈವಿಕ ಇಂಧನ ಸಂಬಂಧಿತ ತಂತ್ರಜ್ಞಾನಗಳತ್ತಲೂ ವಿಸ್ತರಿಸಿದ್ದೇವೆ. ಸಿಎ ಲ್ಯಾಬ್ಸ್‌ನಲ್ಲಿ, ಹೊಸ ಉತ್ಪನ್ನಗಳ ಅಭಿವೃದ್ಧಿ, ಪ್ರಕ್ರಿಯೆಯಲ್ಲಿನ ನಾವೀನ್ಯತೆ ಮತ್ತು ತಂತ್ರಜ್ಞಾನ ವಿನ್ಯಾಸವನ್ನು ಮುನ್ನಡೆಸುವುದು ನನ್ನ ಪ್ರಮುಖ ಜವಾಬ್ದಾರಿಯಾಗಿದೆ. ಇದಕ್ಕೆ ನನಗೆ ಆಯಾ ಕ್ಷೇತ್ರದ ಪರಿಣಿತರ ತಂಡದ ಬೆಂಬಲವಿದೆ.
ರಾಹುಲ್ ಪಿ.: ಸಿಎ ಲ್ಯಾಬ್ಸ್ "ವಿಜ್ಞಾನ ಮತ್ತು ಕೇವಲ ವಿಜ್ಞಾನ" ಎಂಬುದಕ್ಕೆ ಒತ್ತು ನೀಡುತ್ತದೆ. ನಿಮ್ಮ ದೈನಂದಿನ ಉತ್ಪನ್ನಗಳು ಮತ್ತು ತಂತ್ರಜ್ಞಾನದಲ್ಲಿ ಈ ತತ್ವದ ಅರ್ಥವೇನು?
ಡಾ. ಚೇತನ್ ಸಿ. ಜೆ: ಮಾರುಕಟ್ಟೆಯಲ್ಲಿರುವ ಅನೇಕ ಉತ್ಪನ್ನಗಳು ಅಸ್ತಿತ್ವದಲ್ಲಿರುವ ವಿನ್ಯಾಸಗಳನ್ನು, ಅವುಗಳ ಉದ್ದೇಶವನ್ನೇ ಸಂಪೂರ್ಣವಾಗಿ ಅರ್ಥಮಾಡಿಕೊಳ್ಳದೆ ನಕಲು ಮಾಡುವ ಮೂಲಕ ಅಭಿವೃದ್ಧಿಪಡಿಸಲ್ಪಟ್ಟಿವೆ. ಯಾವಾಗ ಮೂಲಭೂತ ತತ್ವಗಳನ್ನು ನಿರ್ಲಕ್ಷಿಸಲಾಗುತ್ತದೆಯೋ, ಆಗ ಆ ಉತ್ಪನ್ನವು ನಿಜವಾದ ಅಗತ್ಯವನ್ನು ಪೂರೈಸುವಲ್ಲಿ ವಿಫಲವಾಗಬಹುದು. ಸಿಎ ಲ್ಯಾಬ್ಸ್‌ನಲ್ಲಿ, ನಾವು ಯಾವುದೇ ಕೆಲಸವನ್ನು 'ಏಕೆ' ಎಂದು ಕೇಳುವ ಮೂಲಕ ಪ್ರಾರಂಭಿಸುತ್ತೇವೆ ಮತ್ತು ಆ ಪ್ರಶ್ನೆಗೆ ಉತ್ತರ ಯಾವಾಗಲೂ ಮೂಲಭೂತ ವೈಜ್ಞಾನಿಕ ತತ್ವಗಳಲ್ಲಿಯೇ ಇರುತ್ತದೆ. ಇಲ್ಲಿ ಇಂಜಿನಿಯರಿಂಗ್ ಎಂಬುದು ಒಂದು ಸೇತುವೆಯಾದರೆ, ತಂತ್ರಜ್ಞಾನವು ಅದರ ಫಲಿತಾಂಶವಾಗಿದೆ. ಅದು ಭೌತಶಾಸ್ತ್ರವಿರಲಿ, ರಸಾಯನಶಾಸ್ತ್ರವಿರಲಿ ಅಥವಾ ಜೀವಶಾಸ್ತ್ರವಿರಲಿ, ನಾವು ನಿರ್ಮಿಸುವ ಪ್ರತಿಯೊಂದು ಪರಿಹಾರವೂ ವೈಜ್ಞಾನಿಕ ಆಧಾರವನ್ನು ಹೊಂದಿರುತ್ತದೆ. ಇದು ನಮ್ಮ ಉತ್ಪನ್ನಗಳಿಗೆ ಸ್ಥಿರತೆ, ಸುಸ್ಥಿರತೆ ಮತ್ತು ವಿಶ್ವಾಸಾರ್ಹತೆಯನ್ನು ನೀಡುತ್ತದೆ.
ರಾಹುಲ್ ಪಿ.: ಎರಡು ದಶಕಗಳ ಅನುಭವದೊಂದಿಗೆ, ವಿಜ್ಞಾನ ಮತ್ತು ತಂತ್ರಜ್ಞಾನದ ಬಗ್ಗೆ ನಿಮ್ಮ ದೃಷ್ಟಿಕೋನ ಹೇಗೆ ಬದಲಾಗಿದೆ?
ಡಾ. ಚೇತನ್ ಸಿ. ಜೆ: ವಿಜ್ಞಾನದ ಬಗೆಗಿನ ನನ್ನ ಕುತೂಹಲ ಶಾಲಾ ದಿನಗಳಲ್ಲಿಯೇ, ವಿಶೇಷವಾಗಿ ಭೌತಶಾಸ್ತ್ರ ಮತ್ತು ಗಣಿತದಲ್ಲಿ ಪ್ರಾರಂಭವಾಯಿತು. ಪರೀಕ್ಷೆಗಳಾಚೆಗೆ ವಸ್ತುಗಳು ಹೇಗೆ ಕೆಲಸ ಮಾಡುತ್ತವೆ ಎಂಬುದನ್ನು ಅರ್ಥಮಾಡಿಕೊಳ್ಳಲು ನಾನು ಯಾವಾಗಲೂ ಆಸಕ್ತಿ ಹೊಂದಿದ್ದೆ. ಕಾಲಕ್ರಮೇಣ, ಈ ಕುತೂಹಲವು ಒಂದು ಶಿಸ್ತುಬದ್ಧ ವೈಜ್ಞಾನಿಕ ವಿಧಾನವಾಗಿ ಪಕ್ವವಾಯಿತು. ಇಂಜಿನಿಯರಿಂಗ್ ಮತ್ತು ಸಂಶೋಧನೆಯ ಮೂಲಕ, ವಿಜ್ಞಾನವು ಕ್ರಮೇಣ ಅನ್ವಯಿಕ ತಂತ್ರಜ್ಞಾನವಾಗಿ, ವಿಶೇಷವಾಗಿ ಜೀವ ವಿಜ್ಞಾನ ಮತ್ತು ಜೈವಿಕ ತಂತ್ರಜ್ಞಾನ ಕ್ಷೇತ್ರಗಳಲ್ಲಿ ಬದಲಾಯಿತು. ಆ ಪ್ರಗತಿಯೇ ಇಂದು ನಾನು ಸಮಸ್ಯೆಗಳನ್ನು ಬಗೆಹರಿಸುವ ರೀತಿಯನ್ನು ರೂಪಿಸಿದೆ.

ರಾಹುಲ್ ಪಿ.: ನಿಮ್ಮ ಪ್ರಮುಖ ಉತ್ಪನ್ನಗಳಲ್ಲಿ ಒಂದನ್ನು ನಮ್ಮ ಓದುಗರಿಗಾಗಿ ಸರಳವಾಗಿ ವಿವರಿಸಬಹುದೇ?
ಡಾ. ಚೇತನ್ ಸಿ. ಜೆ: ನಮ್ಮ ಪ್ರಮುಖ ಆವಿಷ್ಕಾರಗಳಲ್ಲಿ ಒಂದು 'FoodoX'. ಇದನ್ನು ಕೇವಲ ಒಂದು ಯಂತ್ರ ಎನ್ನುವುದಕ್ಕಿಂತ ಸಂಸ್ಕರಣಾ ತಂತ್ರಜ್ಞಾನ ಎಂದು ಕರೆಯುವುದು ಸೂಕ್ತ. ಇದು ಯಾವುದೇ ಅಡೆತಡೆಯಿಲ್ಲದೆ ನಿಯಂತ್ರಿತ ವಲಯಗಳ ಮೂಲಕ ವಸ್ತುಗಳನ್ನು ಸಂಸ್ಕರಿಸುವ ನಿರಂತರ ಕಾರ್ಯಾಚರಣೆಗೆ ಅನುವು ಮಾಡಿಕೊಡುತ್ತದೆ. FoodoX ಮಿಕ್ಸಿಂಗ್, ಹೋಮೋಜಿನೈಸೇಶನ್, ಘನ-ದ್ರವ ಬೇರ್ಪಡಿಸುವಿಕೆ, ಫ್ಲೇವರ್ ಎನ್‌ಕ್ಯಾಪ್ಸುಲೇಷನ್, ಜೆಲಟಿನೈಸೇಶನ್, ಬಾಷ್ಪೀಕರಣ, ತೈಲ ಬೇರ್ಪಡಿಸುವಿಕೆ ಮತ್ತು ಆಹಾರ ಧಾನ್ಯಗಳಲ್ಲಿನ ಪೋಷಕಾಂಶ-ವಿರೋಧಿ ಅಂಶಗಳನ್ನು ಕಡಿಮೆ ಮಾಡುವಂತಹ ಅನೇಕ ಕಾರ್ಯಗಳನ್ನು ನಿರ್ವಹಿಸಬಲ್ಲದು. ಇದು ಫಾರ್ಮಾಸ್ಯುಟಿಕಲ್ ಪ್ರೊಸೆಸಿಂಗ್ ಮತ್ತು ಬಯೋಮಾಸ್ ರಿಸೈಕ್ಲಿಂಗ್‌ನಲ್ಲಿಯೂ ಬಳಕೆಯಾಗುತ್ತದೆ. ಅನೇಕ ಪ್ರತ್ಯೇಕ ಯಂತ್ರಗಳ ಬದಲಾಗಿ ಒಂದೇ, ಸಮಗ್ರ ಪರಿಹಾರವನ್ನು ನೀಡುವುದು ನಮ್ಮ ಉದ್ದೇಶ.
ರಾಹುಲ್ ಪಿ.: ನಿಮ್ಮ ಉತ್ಪನ್ನ ಮತ್ತು ಪ್ರಕ್ರಿಯೆಯ ವಿನ್ಯಾಸಕ್ಕೆ ಯಾವ ವೈಜ್ಞಾನಿಕ ತತ್ವಗಳು ಅಡಿಪಾಯವಾಗಿವೆ?
ಡಾ. ಚೇತನ್ ಸಿ. ಜೆ: ನಮ್ಮ ವಿನ್ಯಾಸಗಳು ಅನ್ವಯಿಕ ಭೌತಶಾಸ್ತ್ರ ಮತ್ತು ಗಣಿತದ ಮಾಡೆಲಿಂಗ್ ಆಧಾರಿತವಾಗಿವೆ. ಶಕ್ತಿಯ ವರ್ಗಾವಣೆ, ವಸ್ತುವಿನ ನಡವಳಿಕೆ ಮತ್ತು ಪ್ರಕ್ರಿಯೆಯ ಡೈನಾಮಿಕ್ಸ್ ಅನ್ನು ಅರ್ಥಮಾಡಿಕೊಳ್ಳಲು ನಾವು ಗಣಿತದ ಸಮೀಕರಣಗಳನ್ನು ಬಳಸುತ್ತೇವೆ. ಯಾವಾಗ ವಿನ್ಯಾಸದ ನಿರ್ಧಾರಗಳು ಗಣಿತ ಮತ್ತು ಭೌತಶಾಸ್ತ್ರದಿಂದ ನಿರ್ದೇಶಿಸಲ್ಪಡುತ್ತವೆಯೋ, ಆಗ ಫಲಿತಾಂಶಗಳು ಊಹಿಸಬಹುದಾದಂತ ಮತ್ತು ಸ್ಥಿರವಾಗಿರುತ್ತವೆ. ಈ ವಿಧಾನವು ದಕ್ಷ ಮತ್ತು ಗಟ್ಟಿಮುಟ್ಟಾದ ಪರಿಹಾರಗಳನ್ನು ನೀಡಲು ನಮಗೆ ಸಹಾಯ ಮಾಡುತ್ತದೆ.
ರಾಹುಲ್ ಪಿ.: ಈ ಉತ್ಪನ್ನಗಳ ಮೂಲಕ ನೀವು ಯಾವ ಸಮಸ್ಯೆಗಳನ್ನು ಬಗೆಹರಿಸಲು ಪ್ರಯತ್ನಿಸುತ್ತಿದ್ದೀರಿ?
ಡಾ. ಚೇತನ್ ಸಿ. ಜೆ: ಪ್ರಯೋಗಾಲಯದ ಸಂಶೋಧನೆ ಮತ್ತು ನೈಜ ಜಗತ್ತಿನ ಕೈಗಾರಿಕಾ ಅಪ್ಲಿಕೇಶನ್‌ಗಳ ನಡುವೆ ಸಾಮಾನ್ಯವಾಗಿ ದೊಡ್ಡ ಅಂತರವಿರುತ್ತದೆ. ಸಂಶೋಧನೆಗಳು ಕೇವಲ ಪ್ರಬಂಧಗಳಿಗೆ ಸೀಮಿತವಾಗಿದ್ದರೆ, ಫ್ಯಾಬ್ರಿಕೇಶನ್ ಮತ್ತು ಉತ್ಪಾದನೆಗಳು ಆಳವಾದ ವೈಜ್ಞಾನಿಕ ಒಳನೋಟವಿಲ್ಲದೆ ನಡೆಯುತ್ತವೆ. ನಮ್ಮ ಗಮನವು ಸಂಶೋಧನೆಯನ್ನು ಇಂಜಿನಿಯರಿಂಗ್ ಪರಿಹಾರಗಳಾಗಿ ಪರಿವರ್ತಿಸುವುದು ಅಂದರೆ ವಿಜ್ಞಾನ, ಅಪ್ಲಿಕೇಶನ್ ಮತ್ತು ಉದ್ಯಮವನ್ನು ಬೆಸೆಯುವುದು. ಇದರಿಂದ ತಂತ್ರಜ್ಞಾನವು ಕೇವಲ ವಾಣಿಜ್ಯ ಲಾಭಕ್ಕಾಗಿ ಮಾತ್ರ ಇರದೆ, ನಿಜವಾಗಿಯೂ ಬಳಕೆದಾರರಿಗೆ ಉಪಯುಕ್ತವಾಗುತ್ತದೆ.
ರಾಹುಲ್ ಪಿ.: ನಿಖರತೆ ಮತ್ತು ವಿಶ್ವಾಸಾರ್ಹತೆಯನ್ನು ಕಾಯ್ದುಕೊಳ್ಳುವಾಗ ನಿಮ್ಮ ತಂತ್ರಜ್ಞಾನಗಳು ಮನುಷ್ಯರ ಮೇಲಿನ ಅವಲಂಬನೆಯನ್ನು ಹೇಗೆ ಕಡಿಮೆ ಮಾಡುತ್ತವೆ?
ಡಾ. ಚೇತನ್ ಸಿ. ಜೆ: ನಮ್ಮ ಸಿಸ್ಟಮ್‌ಗಳನ್ನು ಸುಧಾರಿತ ಆಟೊಮೇಷನ್ ಮತ್ತು ಹ್ಯೂಮನ್-ಮೆಷಿನ್ ಇಂಟರ್‌ಫೇಸ್‌ಗಳೊಂದಿಗೆ ವಿನ್ಯಾಸಗೊಳಿಸಲಾಗಿದೆ. ನಿಯಂತ್ರಿತ ಕಾರ್ಯಾಚರಣೆಗಳು ಏಕರೂಪತೆಯನ್ನು ಖಚಿತಪಡಿಸುತ್ತವೆ ಮತ್ತು ಮಾನವ ಸಹಜ ತಪ್ಪುಗಳನ್ನು ಕಡಿಮೆ ಮಾಡುತ್ತವೆ. ಎಲೆಕ್ಟ್ರಾನಿಕ್ಸ್ ಮತ್ತು ಕಂಟ್ರೋಲ್ ಸಿಸ್ಟಮ್‌ಗಳನ್ನು ಸಂಯೋಜಿಸುವ ಮೂಲಕ, ಮ್ಯಾನುಯಲ್ ಪ್ರಕ್ರಿಯೆಗಳಲ್ಲಿ ಸಿಗದಿರುವ ನಿಖರತೆಯನ್ನು ನಾವು ಸಾಧಿಸುತ್ತೇವೆ.
ರಾಹುಲ್ ಪಿ.: ಭಾರತದಲ್ಲಿ ವಿಜ್ಞಾನ ಆಧಾರಿತ ಹಾರ್ಡ್‌ವೇರ್ ಪರಿಹಾರಗಳನ್ನು ಅಭಿವೃದ್ಧಿಪಡಿಸುವಾಗ ನೀವು ಎದುರಿಸಿದ ಸವಾಲುಗಳೇನು?
ಡಾ. ಚೇತನ್ ಸಿ. ಜೆ: ವಿಶ್ವಾಸಾರ್ಹವಾದ ಇಕೋಸಿಸ್ಟಮ್ ಅಥವಾ ಪರಿಸರ ವ್ಯವಸ್ಥೆಯನ್ನು ನಿರ್ಮಿಸುವುದು ದೊಡ್ಡ ಸವಾಲಾಗಿತ್ತು. ಸಂಕೀರ್ಣ ವಿನ್ಯಾಸಗಳನ್ನು ಕಾರ್ಯಗತಗೊಳಿಸಬಲ್ಲ ನುರಿತ ತಂತ್ರಜ್ಞರು, ಎಲೆಕ್ಟ್ರಾನಿಕ್ಸ್ ಪರಿಣಿತರು ಮತ್ತು ಕಚ್ಚಾ ವಸ್ತುಗಳ ಪೂರೈಕೆದಾರರನ್ನು ಹುಡುಕುವುದು ಕಷ್ಟದ ಕೆಲಸವಾಗಿತ್ತು. ಕೇವಲ ಐಡಿಯಾಗಳಿದ್ದರೆ ಸಾಲದು; ಅದನ್ನು ಕಾರ್ಯಗತಗೊಳಿಸಲು ಬಲವಾದ ಬೆಂಬಲ ವ್ಯವಸ್ಥೆ ಬೇಕು. ಈ ವ್ಯವಸ್ಥೆಯನ್ನು ಅಭಿವೃದ್ಧಿಪಡಿಸಲು ಸಾಕಷ್ಟು ಸಮಯ ಮತ್ತು ಶ್ರಮ ಬೇಕಾಯಿತು.
ರಾಹುಲ್ ಪಿ.: ಈ ಸವಾಲುಗಳನ್ನು ನೀವು ಹೇಗೆ ಜಯಿಸಿದಿರಿ?
ಡಾ. ಚೇತನ್ ಸಿ. ಜೆ: ತರಬೇತಿ, ನಿಕಟ ಸಹಯೋಗ ಮತ್ತು ನಿರಂತರ ಮಾರ್ಗದರ್ಶನ ಇದರಲ್ಲಿ ಪ್ರಮುಖ ಪಾತ್ರ ವಹಿಸಿದವು. ಜನರ ಸ್ಥೈರ್ಯವನ್ನು ಹೆಚ್ಚಿಸುವುದು ಮತ್ತು ಅವರ ಕೌಶಲ್ಯಗಳನ್ನು ತಿದ್ದಿತೀಡುವುದು ದೊಡ್ಡ ಬದಲಾವಣೆಯನ್ನು ತಂದಿತು. ನಾವು ಅಂದುಕೊಂಡ ಗುಣಮಟ್ಟವನ್ನು ನೀಡಬಲ್ಲ ವ್ಯವಸ್ಥೆಯನ್ನು ರೂಪಿಸಲು ಸುಮಾರು ಒಂದೂವರೆ ವರ್ಷ ಬೇಕಾಯಿತು. ಈ ಹಂತದಲ್ಲಿ ಛಲ ಮತ್ತು ಸಾತ್ಯತ್ಯ ಬಹಳ ಮುಖ್ಯವಾಗಿತ್ತು.

ರಾಹುಲ್ ಪಿ.: ಇಂಧನ ದಕ್ಷತೆ ಮತ್ತು ತ್ಯಾಜ್ಯ ಕಡಿತದಂತಹ ಸುಸ್ಥಿರತೆಯ ಅಂಶಗಳನ್ನು ನಿಮ್ಮ ತಂತ್ರಜ್ಞಾನಗಳು ಹೇಗೆ ನಿರ್ವಹಿಸುತ್ತವೆ?
ಡಾ. ಚೇತನ್ ಸಿ. ಜೆ: ನಾವು ಎನರ್ಜಿ ಇಂಜಿನಿಯರಿಂಗ್ ಮತ್ತು ಸುಸ್ಥಿರತೆಗೆ ಹೆಚ್ಚಿನ ಒತ್ತು ನೀಡುತ್ತೇವೆ. ಸಾಧ್ಯವಿರುವೆಡೆ ಬಯೋಗ್ಯಾಸ್, ಬಯೋಮಿಥನೇಷನ್ ಮತ್ತು ಸೌರಶಕ್ತಿಯಂತಹ ನವೀಕರಿಸಬಹುದಾದ ಇಂಧನ ಮೂಲಗಳನ್ನು ಬಳಸುತ್ತೇವೆ. ಅಗತ್ಯವಿರುವಷ್ಟು ಶಕ್ತಿಯನ್ನು ಮಾತ್ರ ಪೂರೈಸುವಂತೆ ನಮ್ಮ ಪ್ರಕ್ರಿಯೆಗಳನ್ನು ವಿನ್ಯಾಸಗೊಳಿಸಲಾಗುತ್ತದೆ, ಇದರಿಂದ ಅನಗತ್ಯ ವ್ಯರ್ಥವಾಗುವುದನ್ನು ತಪ್ಪಿಸಬಹುದು. ಹಾಗೆಯೇ ಸಾವಯವ ತ್ಯಾಜ್ಯವನ್ನು ಇಂಧನ ಪೆಲೆಟ್‌ಗಳಾಗಿ ಪರಿವರ್ತಿಸುವ ಮೂಲಕ ನಾವು ತ್ಯಾಜ್ಯ ಕಡಿತ ಮತ್ತು ಮರುಬಳಕೆಯತ್ತಲೂ ಗಮನ ಹರಿಸುತ್ತೇವೆ.
ರಾಹುಲ್ ಪಿ.: ಇಂಧನ ಬಳಕೆಯನ್ನು ಅತ್ಯುತ್ತಮವಾಗಿಸಲು ಮತ್ತು ಓವರ್‌ಹೀಟಿಂಗ್ ತಡೆಯಲು ನೀವು ಯಾವ ತಂತ್ರಜ್ಞಾನಗಳನ್ನು ಬಳಸುತ್ತೀರಿ?
ಡಾ. ಚೇತನ್ ಸಿ. ಜೆ: ಶಕ್ತಿಯ ಅಗತ್ಯವನ್ನು ನಿಖರವಾಗಿ ಅಂದಾಜು ಮಾಡಲು ನಾವು ಕಂಪ್ಯೂಟೇಶನಲ್ ಮೆಕ್ಯಾನಿಕ್ಸ್ ಮತ್ತು ಗಣಿತದ ಮಾಡೆಲಿಂಗ್ ಅನ್ನು ಬಳಸುತ್ತೇವೆ. ಭೌತಿಕ ನಡವಳಿಕೆಯನ್ನು ಸಿಮ್ಯುಲೇಟ್ ಮಾಡುವ ಮೂಲಕ, ನಾವು ಶಕ್ತಿಯ ನಷ್ಟವನ್ನು ಕಡಿಮೆ ಮಾಡುತ್ತೇವೆ ಮತ್ತು ಅತ್ಯಂತ ಕಡಿಮೆ ದೋಷದ ಮಾರ್ಜಿನ್‌ಗಳಲ್ಲಿ ಕಾರ್ಯನಿರ್ವಹಿಸುತ್ತೇವೆ. ಇದು ಪ್ರಕ್ರಿಯೆಗಳನ್ನು ದಕ್ಷವಾಗಿಸುತ್ತದೆ.
ರಾಹುಲ್ ಪಿ.: ಸಿಎ ಲ್ಯಾಬ್ಸ್ ಶಿಕ್ಷಣ ಮತ್ತು ವೈಜ್ಞಾನಿಕ ಚಿಂತನೆಯನ್ನು ಬಲಪಡಿಸುವತ್ತ ಗಮನಹರಿಸುತ್ತದೆ. ಇದಕ್ಕೆ ಉದ್ಯಮ ರಂಗ ಹೇಗೆ ಅರ್ಥಪೂರ್ಣವಾಗಿ ಕೊಡುಗೆ ನೀಡಬಹುದು?
ಡಾ. ಚೇತನ್ ಸಿ. ಜೆ: ಉದ್ಯಮ ರಂಗವು ಉಪನ್ಯಾಸಗಳು, ಕಾರ್ಯಾಗಾರಗಳು ಮತ್ತು ಮಾರ್ಗದರ್ಶನದ ಮೂಲಕ ಶಿಕ್ಷಣ ಕ್ಷೇತ್ರದೊಂದಿಗೆ ಸಕ್ರಿಯವಾಗಿ ತೊಡಗಿಸಿಕೊಳ್ಳಬೇಕು. ಶಿಕ್ಷಣವು ಪರೀಕ್ಷೆಗಳಾಚೆಗೆ ಹೋಗಿ, ಸಮಸ್ಯೆ ಪರಿಹಾರ, ವಿಮರ್ಶಾತ್ಮಕ ಚಿಂತನೆ ಮತ್ತು ನೈಜ ಪ್ರಪಂಚದ ಅಪ್ಲಿಕೇಶನ್‌ಗಳತ್ತ ಗಮನ ಹರಿಸಬೇಕು. ಕಲಿಕೆ ಎಂಬುದು ಕೇವಲ ಅಂಕಗಳನ್ನು ಗಳಿಸುವುದಲ್ಲ, ಸವಾಲುಗಳನ್ನು ಎದುರಿಸಲು ವ್ಯಕ್ತಿಗಳನ್ನು ಸಿದ್ಧಪಡಿಸುವುದಾಗಿದೆ.
ರಾಹುಲ್ ಪಿ.: ವಿಜ್ಞಾನ ಆಧಾರಿತ ಉತ್ಪಾದನೆಯು ಭಾರತದ ಭವಿಷ್ಯವನ್ನು ಹೇಗೆ ರೂಪಿಸುತ್ತದೆ ಎಂದು ನೀವು ಭಾವಿಸುತ್ತೀರಿ?
ಡಾ. ಚೇತನ್ ಸಿ. ಜೆ: ಮಾನವ ಸಂಪನ್ಮೂಲವೇ ಭಾರತದ ಅತಿದೊಡ್ಡ ಶಕ್ತಿ. ವೈಜ್ಞಾನಿಕವಾಗಿ ಮುಂದುವರಿದ ರಾಷ್ಟ್ರವನ್ನು ಕಟ್ಟಲು, ಯುವ ಮನಸ್ಸುಗಳನ್ನು ಉದ್ಯಮಕ್ಕೆ ಸಿದ್ಧರಾಗುವಂತೆ ಮತ್ತು ಪರಿಹಾರ ಆಧಾರಿತವಾಗಿ ಯೋಚಿಸುವಂತೆ ತರಬೇತುಗೊಳಿಸಬೇಕು. ಶಿಕ್ಷಣ ವ್ಯವಸ್ಥೆಯು ಅಪ್ಲಿಕೇಶನ್, ನಾವೀನ್ಯತೆ ಮತ್ತು ಉದ್ಯಮಶೀಲತೆಗೆ ಒತ್ತು ನೀಡಬೇಕು. ಈ ವಿಧಾನವು ರಾಷ್ಟ್ರೀಯ ಉತ್ಪಾದಕತೆ ಮತ್ತು ಆರ್ಥಿಕ ಬೆಳವಣಿಗೆಯನ್ನು ಬಲಪಡಿಸುತ್ತದೆ.
ರಾಹುಲ್ ಪಿ.: ಸ್ಪರ್ಧಾತ್ಮಕ ಪರಿಸರದಲ್ಲಿ ವೈಜ್ಞಾನಿಕ ಪ್ರತಿಭೆಗಳನ್ನು ನೀವು ಹೇಗೆ ಆಕರ್ಷಿಸುತ್ತೀರಿ ಮತ್ತು ಉಳಿಸಿಕೊಳ್ಳುತ್ತೀರಿ?
ಡಾ. ಚೇತನ್ ಸಿ. ಜೆ: ಇಲ್ಲಿ ಸಹಯೋಗ ಪ್ರಮುಖ ಪಾತ್ರ ವಹಿಸುತ್ತದೆ. ಯಾವುದೇ ಸಂಸ್ಥೆಯು ಎಲ್ಲಾ ಕೌಶಲ್ಯಗಳನ್ನು ತನ್ನಲ್ಲಿಯೇ ಹೊಂದಿರಲು ಸಾಧ್ಯವಿಲ್ಲ. ಸಮ್ಮೇಳನಗಳು, ಕಾರ್ಯಾಗಾರಗಳು ಮತ್ತು ಸಹಯೋಗದ ವೇದಿಕೆಗಳಲ್ಲಿ ತೊಡಗಿಸಿಕೊಳ್ಳುವ ಮೂಲಕ, ನಾವು ಒಬ್ಬರಿಗೊಬ್ಬರು ಪೂರಕವಾಗಿರುವ ಪರಿಸರ ವ್ಯವಸ್ಥೆಯನ್ನು ನಿರ್ಮಿಸುತ್ತೇವೆ. ಈ ವಾತಾವರಣವು ಸಹಜವಾಗಿಯೇ ಪ್ರತಿಭೆಗಳನ್ನು ಆಕರ್ಷಿಸುತ್ತದೆ ಮತ್ತು ಉಳಿಸಿಕೊಳ್ಳುತ್ತದೆ.

ರಾಹುಲ್ ಪಿ.: ಯುವ ತಂತ್ರಜ್ಞಾನ ಉತ್ಸಾಹಿಗಳು ಮತ್ತು ವೃತ್ತಿಪರರಿಗೆ ನೀವು ಏನು ಸಂದೇಶ ನೀಡಲು ಬಯಸುತ್ತೀರಿ?
ಡಾ. ಚೇತನ್ ಸಿ. ಜೆ: ಯುವ ವೃತ್ತಿಪರರು ಸಮಸ್ಯೆ ಬಗೆಹರಿಸುವ ಸಾಮರ್ಥ್ಯವನ್ನು ಬೆಳೆಸಿಕೊಳ್ಳುವತ್ತ ಮತ್ತು ಉದ್ಯಮಕ್ಕೆ ಬೇಕಾದ ರೀತಿಯಲ್ಲಿ ಸಿದ್ಧರಾಗುವತ್ತ ಗಮನ ಹರಿಸಬೇಕು. ಪರೀಕ್ಷೆಗಳು ಮುಖ್ಯ, ಆದರೆ ಪ್ರಾಯೋಗಿಕ ಸಮಸ್ಯೆಗಳನ್ನು ಬಗೆಹರಿಸಲು ಜ್ಞಾನವನ್ನು ಅನ್ವಯಿಸುವುದರಲ್ಲಿ ನೈಜ ಕಲಿಕೆ ಇದೆ. ಹೊಸದನ್ನು ನಿರ್ಮಿಸುವ ಮತ್ತು ಸೃಷ್ಟಿಸುವ ಮೂಲಕ ಪಡೆಯುವ ಅನುಭವವೇ ಅಂತಿಮವಾಗಿ ಅರ್ಥಪೂರ್ಣ ವೃತ್ತಿಜೀವನವನ್ನು ರೂಪಿಸುತ್ತದೆ.

(ಪ್ರಾಯೋಜಿತ)